سەرپەرشتیاری ئیدارەی سۆران: چیای کۆڕەک بۆردوومان نەکراوە

 

هەڵگورد شێخ نەجیب، سەرپەرشتیاری ئیدارەی سەربەخۆی سۆران، رۆژی دووشەممە، 2ـی ئاداری 2026، بە تۆڕی میدیایی رووداوی گوت: "بۆردوومانکردنی چیای کۆڕەک دوورە لە راستییەوە و هیچ بۆردوومانێک نەبووە".

 

سەرپەرشتیاری ئیدارەی سەربەخۆی سۆران گوتی: "ئێوارەی ئەمڕۆ لە نزیک رواندوز و بەرامبەر چیای کۆڕەک مین بە هاونیشتمانییەکدا تەقیوەتەوە و برینداری کردووە؛ هەر ئەوە هەبووە".

 

هەروەها حەکیم تێلی، جێگری سەرپەرشتیاری ئیدارەی سەربەخۆی سۆران بە رووداوی گوت: "لەگەڵ بەرپرسانی ناوچەکەش بەدواداچوونمان کرد، راست نییە و هیچ بۆردوومانێک نەبووە".

 

هێرشی ئەمجارەی ئیسرائیل و ئەمریکا بۆ سەر ئێران لە رۆژی 28ی شوبات دەستیپێکرد، ئێرانیش بە مووشەک و درۆن وەڵامی هێرشەکەی داوەتەوە، لەو رۆژەوە تاوەکو ئێستا ئێران و گرووپە چەکدارە شیعەکانی عێراق چەند جارێک درۆن و مووشەکیان ئاراستەی هەرێمی کوردستان کردووە.