شێخ جەعفەر شێخ مستەفا سەنگەرەکانی میحوەری رۆژئاوای کەرکووکی بەسەرکردەوە

 

 

لە راگەیێندراوی سەرۆکایەتیی هەرێمی کوردستاندا هاتووە، جێگری سەرۆکی هەرێمی کوردستان دووپاتیکردەوە کە سەرۆکایەتیی هەرێمی کوردستان چەندین جار بە حکومەتی فیدراڵیی عێراق و هاوپەیمانانی راگەیاندووە، کە داعش مەترسییە و هەمیشە لە هەوڵی خۆڕێکخستنەوە و تێکدانی ئارامیی ناوچەکەدایە، بەتایبەت لە ناوچەکانی ماددەی 140 کە بۆشاییەکی ئەمنیی زۆری تێدایە و هەماهەنگییەکی تەواو سەربازیش لەنێوان سوپای عێراق و هێزەکانی پێشمەرگەدا بۆ پاراستن و دابینکردنی سەقامگیریی زیاتر لە ناوچەکە نییە.

 

شێخ جەعفەر شێخ مستەفا جەختیکردەوە، سەرۆکایەتیی هەرێمی کوردستان کاری خێراتر دەکات بۆ دروستبوونی هێزێکی هاوبەش لەنێوان سوپای عێراق و پێشمەرگە بۆ رووبەڕووبوونەوە و پاراستنی ئەو ناوچانە لە داعش، چونکە بەردەوامبوونیان مەترسییە بۆسەر ئاسایشی عێراق، هەرێمی کوردستان و جیهان بەگشتی.

 

سەرۆکایەتیی هەرێمی کوردستان دەڵێت، "دوای گەڕانەوەی لە میحوەرەکانی هێزی پێشمەرگە، جێگری سەرۆکی هەرێمی کوردستان سەردانی ماڵی شەهیدان و بریندارانی ئەو هێرشە تیرۆریستییەی کرد و سەرەخۆشی و هاوخەمیی سەرۆکایەتیی هەرێمی کوردستانی گەیاندە خانەوادەی سەربەرزیان و هیوای زوو چاکبوونەوەی بۆ برینداران خواست".