500 خێزانی کەمپی ئاشتیی عەربەت دەگەڕێنەوە زێدی خۆیان

 

 

دابان محەممەد، بەڕێوەبەری ناحیەی عەربەت رۆژی پێنجشەممە 2ی ئاداری 2024 بە رووداوی گوت: "بڕیارە هەفتەی داهاتوو 500 خێزانی دیکەی کەمپی ئاوارەکانی ئاشتی بگەڕێنەوە زێدی خۆیان".

 

کەمپی ئاشتی، دەکەوێتە ناحیەی عەربەت لە سنووری پارێزگای سلێمانی و هەزار و 354 خێزانی ئاوارەی تێدایە. 

 

هەر خێزانێکی گەڕاوە چوار ملیۆن دینار، تەلەفزیۆن، تابەخ و بەفرگرێکی پێدەدەرێت، ماڵەکەشی بێبەرامبەر بۆ دەگوازرێتەوە. بەڕێوەبەری ناحیەی عەربەت  دەڵێت: "ئەوە هاندانێکە تاوەکو ئاوارەکان بگەڕێنەوە زێدی خۆیان."

 

مانگی رابردوو نزیکەی 245 خێزانی کەمپەکە گەڕانەوە زێدی خۆیان. 

 

عەلی عەباس، گوتەبێژی وەزارەتی کۆچ و کۆچبەرانی عێراق و بەرپرسی لقەکان لە وەزارەتەکە، رۆژی یەکشەممە 27ی نیسانی 2024 بە رووداوی راگەیاند: "لە پارێزگای سلێمانی تەنیا یەک کەمپی ئاوارەکان ماوە، ئەویش کەمپی ئاشتییە. ئێستا ژمارەی ئاوارەکانی بۆ نزیکەی نیوە کەمبووەتەوە، ئەوانی دیکە گەڕاونەتەوە زێدی خۆیان". 

 

 گوتەبێژی وەزارەتی کۆچ و کۆچبەرانی عێراق گوتیشی: "دوای 15ی ئایار کە  وەرزی خوێندنی ئەمساڵ کۆتایی دێت، تەواوی ئاوارەکانی ئەو کەمپە دەگەڕێنەوە و کەمپەکە دادەخرێت."

 

رۆژی 19 ئاداری 2024  کەمپی تازە دێ لە سنووری ئیدارەی گەرمیان داخرا. بەپێی دوایین ئاماری وەزارەتی کۆچ و کۆچبەرانی عێراق، لە هەرێمی کوردستاندا 23 کەمپ هەن.