پارێزگاری هەولێر: کۆبوونەوەی باشمان لەگەڵ بەرپرسانی ئێران هەبوو

 

 

ئەمڕۆ هەینی 02-05-2025 ئومێد خۆشناو، پارێزگاری هەولێر لەگەڵ رەزا رەحمانی، پارێزگاری ورمێ کۆبووەوە و دواتر لە کۆنفرانسێکی رۆژنامەڤانیدا بە میدیاکانی رایگەیاند، "ورمێ رۆڵی سەرەکی لە پەرەپێدانی پەیوەندییە ئابوورییەکانمان لەگەڵ وڵاتی ئێران هەیە."

 

پارێزگاری هەولێر بە پێویستی دەزانێت پەرە بە پەیوەندییە دوولایەنەکانی نێوان ورمێ و هەولێر بدرێت و دەڵێت، "پاڵپشتیی هەر هەوڵێک دەکەین بۆ بەرزکردنەوەی ئاستی ئەم پەیوەندییانە."

 

لە بەشێکی دیکەی قسەکانیدا ئومێد خۆشناو ئاماژەی بە سەردانەکەی مەسعود پزیشکیان، سەرۆککۆماری ئێران بۆ هەرێمی کوردستان کرد و ئەوەی خستەڕوو، "سەردانەکەی بەڕێزیان دەرخەری پەیوەندیی باشی نێوانمانە."

 

ئەوە یەکەم دیداری پارێزگاری هەولێر لەگەڵ پارێزگاری نوێی ورمێ بوو لەدوای دەستبەکاربوونی لە 4ی کانوونی یەکەمی 2024. پارێزگاری هەولێر ئەوەی خستەڕوو، "لەم سەردانەدا بەگشتی کۆبوونەوەی باشمان لەگەڵ بەرپرسانی ئێران هەبوو؛ هیوادارم سەردانەکە کاریگەریی لەسەر بەرەوپێشبردن و پەرەپێدانی پەیوەندییەکانمان هەبێت."

 

ساڵانە ژمارەیەکی زۆر لە زیارەتکارانی ئێران و رۆژهەڵاتی کوردستان، لە رێگەی دەروازە سنوورییەکانی حاجی ئۆمەران و باشماخی هەرێمی کوردستانەوە سەردانی شوێنە پیرۆزەکانی شیعە لە عێراق دەکەن. بەشێک لە قسەکانی ئومێد خۆشناو تایبەت بوون بە هاتووچۆی زیارەتکاران و گوتی، "لە ئێستاوە ئامادەی پێشوازیکردن و ئاسانکاریین بۆ هاتووچۆیان."

 

هاوکات رەزا رەحمانی، پارێزگاری ورمێ باسی لە کردنەوەی دەروازەی سنووریی کێلەشین کرد، کە دەکەوێتە سنووری قەزای سیدەکان و شاری شنۆی رۆژهەڵاتی کوردستان.

 

پارێزگاری ورمێ پێیوایە کردنەوەی ئەو دەروازە سنوورییە دەبێتە هۆی پەرەپێدانی ئاڵوگۆڕی بازرگانی. رەحمانی ئاماژەی بەوەش کرد، "ئێستا رێکارە کارگێڕییەکان بۆ کردنەوەی دەروازە سنوورییەکە گیراونەتەبەر و هیوادارم بە زووترین کات بکرێتەوە."

 

رۆژی 27-04-2025 پارێزگاری هەولێر بە سەرپەرشتیی شاندێک بۆ بەشداریکردن لە پێشانگەی نێودەوڵەتیی "ئێکسپۆ 2025" گەیشتە تاران و لەلایەن ژمارەیەک لە بەرپرسانی وڵاتەکەوە پێشوازیی لێکرا.

 

ئومێد خۆشناو جگە لە پارێزگاری ورمێ، لەگەڵ پارێزگارەکانی تاران، قەزوێن و زەنجانیش کۆبووەوە.