منداڵێکی 11 ساڵ لە خەبات خنکا
رووداو دیجیتاڵ
منداڵێکی تەمەن 11 ساڵ لە سنووری قەزای خەبات لە پارێزگای هەولێر لە ئاودا خنکا.
مقەدەم شاخەوان سەعید، گوتەبێژی بەرگریی شارستانیی هەولێر، ئەمڕۆ دووشەممە بە تۆڕی میدیایی رووداوی گوت: "منداڵەکە لەکاتی مەلەکردن دا لە پڕۆژەی ئاوی خەبات خنکاوە".
ئەو منداڵەی خنکاوە ناوی مالیک ماهیر محەممەدە، دوای نیو کاژێر لە خنکانی تەرمەکەی دەرهێندراوە و رەوانەی دادپزیشکی هەولێر کراوە.
ساڵانە لەگەڵ هاتنی وەرزی گەرمادا، رێژەی خنکان لە چەم و رووبارەکانی هەرێمی کوردستان بەرز دەبێتەوە.
بەگوێرەی ئاماری بەرگری شارستانیی هەولێر بۆ رووداو، ئەمساڵ تاوەکو ئەمڕۆ هەشت کەس لە سنوورەکە لە ئاودا خنکاون.