پارێزگاری ئیلام: لە هەفتەیەکدا 250 هەزار زیارەتکار بە دەروازەی مێهراندا هاتووچۆیان کردووە

 

 

ئەحمەد کەرەمی، پارێزگاری ئیلامی رۆژهەڵاتی کوردستان رایگەیاند، لە سەرەتای مانگی سەفەر (26ی تەممووز)ەوە تاوەکو کاژێر 21:00ـی رۆژی هەینی 01-08-2025 لانیکەم 250 هەزار زیارەتکاری شوێنە پیرۆزەکانی عێراق بە دەروازەی سنووریی مێهراندا تێپەڕیون.

 

بە گوتەی ئەحمەد کەرەمی، زیاتر لە 70 هەزاریان تەنیا لە 24 کاژێری پێش کاژێر 21:00ی رۆژی هەینی هاتووچۆیان کردووە.

 

پارێزگاری ئیلام ئاماژەی بە "ئامادەیی تەواو"یان بۆ پێشوازیکردن لە زیارەتکاران کرد و گوتی، "سەرجەم پێداویستییەکان بۆ خزمەتگوزاری دابینکراون و نزیکەی 400 گرووپ لە سەرانسەری پارێزگا، سەرقاڵی ئامادەکردنی خواردن و خواردنەوەن بۆ زیارەتکاران."

 

چلەی ئیمامی حوسێن لای شیعەکان بایەخی زۆری پێدەدرێ و ئەم ساڵ دەکەوێتە 14ـی مانگی ئاب. 

 

وەک ئەحمەد کەرەمی دەڵێت، بۆ هاتووچۆی زیارەتکاران و راییکردنی رێوڕەسمە ئایینییەکە، هاوئاهەنگییەکی "زۆر باش" لەنێوان بەرپرسانی عێراق و ئێران هەیە، "ئەوە دەبێتە هۆی خێراتر تەواوکردنی مامەڵەی زیارەتکاران لە دەروازە سنوورییەکانی نێوانیان."

 

دەروازەی سنووریی مێهران بە دووریی 85 کیلۆمەتر کەوتووەتە باشووری رۆژئاوای شاری ئیلام و لە دیوی عێراقەوە دەکەوێتە سنووری پارێزگای واست و ناوی زڕباتیەیە کە بەهۆی نزیکی لە شوێنە پیرۆزەکانی شیعە لە عێراق، زۆرترین زیارەتکاری ئێرانی و بیانی هاتووچۆی پێدا دەکەن.