پارێزگاری کەرکووک دامەزراندنی 7 هەزار کەسی راگەیاند

 

رۆژی پێنجشەممە، رێبوار تەها، پارێزگاری کەرکووک لە کۆنفرانسێکی رۆژنامەڤانیدا رایگەیاند، سێشەممەی داهاتوو لینکی دامەزراندنەکە کارا دەبێت و دامەزراندنەکە لە رێگەی لینکێکی ئەلیکترۆنییە و سەر بە پارێزگایە.

 

پارێزگاری کەرکووک لەبارەی چۆنیەتی دامەزراندنەکەوە گوتی، "هیچ کەسیک ناتوانێت دەستوەردان لە دامەزراندنەکە دا بکات و هەموو وردەکارییەکانی دامەزراندن دیاریکراون و بە گوێرەی کێبڕکێ دەبێت."

 

رووداو بەیانیی ئەمڕۆ پێنجشەممە، زانیاریی لەبارەی دامەزراندنی ئەو 7 هەزار کەسە ئاشکرا کردبوو. 

 

عەبدوڵڵا میروەیس، ئەندامی ئەنجوومەنی پارێزگای کەرکووک، بەیانیی ئەمڕۆ پێنجشەممە، 2-10-2025، بە تۆڕی میدیایی رووداوی راگەیاندبوو، بڕیارە کاژێر 10:00ـی بەیانیی ئەمڕۆ پێنجشەممە، رێبوار تەها، پارێزگاری کەرکووک، لە کۆنگرەیەکی رۆژنامەڤانیدا کردنەوەی دەرگەی دامەزراندن بۆ 7 هەزار و 304 کەس بەشێوەی گرێبەست رابگەیێنێت.

 

عەبدوڵڵا میروەیس، ئەندامی فراکسیۆنی یەکێتیی نیشتمانیی کوردستان ئاماژەی بەوە کرد، بەگوێرەی رێکارەکان، ئەو کەسانەی داوای دامەزراندن دەکەن، لە رێگەی بەستەرێکی ئەلیکترۆنییەوە داواکارییەکانیان پێشکێش دەکەن و بەگوێرەی پێوەرەکان وەردەگیرێن، هەروەها هەوڵدەدرێت رەچاوی هاوسەنگیی نێوان پێکهاتەکانی کەرکووک بکرێت.

 

بەگوێرەی یاسای بودجەی گشتیی سێ ساڵەی عێراق، پشکی کەرکووک لە دامەزراندنی 150 هەزار کەس بەشێوەی گرێبەست، 7 هەزار و 304 کەسە، کە جگە لە کەرتی پەروەردە، سەرجەم کەرتەکانی دیکە دەگرێتەوە.

 

بۆ وەرگرتن چەند پێوەرێک دانراون، لەوانە؛ پێویستیی دامەزراوەکان و رێژەی دانیشتووانی قەزا و ناحیەکانی پارێزگاکە.

 

پێشتر چەند جارێک وادەی پێشکێشکردنی داواکاری بۆ ئەو دامەزراندنە راگەیێندرابوو، بەڵام بە هۆکاری جیا جیا دواخرابوو.