لەساڵی 2005ەوە كاری رۆژنامەڤانی دەكات. لە ساڵی 2015 دەستیكردووە بە كاركردن لەگەڵ تۆڕی میدیایی رووداو لە نوسینگەی كەركووك. دوای هێرشەكانی 16ی ئوكتۆبەر ماوەیەك لە نووسینگەی سلێمانی كاری كردووە. 

رووماڵی هێرشەكانی داعش و بەرگری و ئۆپەراسیۆنەكانی پێشمەرگەی كردووە لە پارێزگای كەركووك. چیرۆكە مرۆییەكانی ئاوارەكانی شەڕ بەشێكی بەر چاوبووە لە كارەكانی بەدرێژایی شەڕی داعش. ڤیتییەكی سەبارەت بە هەوڵی تەقاندنەوەی مێردمنداڵێك لەلایەن داعشەوە لەساڵی 2016 لە گەڕەكی تسعین لە شاری كەركووك، یەكێكبووە لە ڤیتییە زۆر بینراوەكانی. 

بەرەبەیانی 21ی تشرینی یەكەمی 2016 زیاتر لە 100 چەكداری داعش دزەیانكردە نێو سێ باڵەخانە و مۆڵی كەركووك، ئەو رۆژەش رووماڵی رووداو وەك زۆر جاری دیكە لەلایەن ئاژانسەكانی جیهانەوە وەرگیرا و چووە سەر شاشەی تەلەڤزیۆنەكانی وڵاتان. ئەو رووماڵە لەلایەن هەردی محەممەد و شادیە رسوول و  كامێرامانەكانی رووداوەوە زۆر بە سەركەوتوویی ئەنجامدرا. 

هەردی محەممەد، لەگەڵ ژمارەیەك پەیامنێری دیكەی رووداو دا بەشداربوو لە رووماڵكردنی هێرشەكانی پێشمەرگە بۆ سەر داعش لە پارێزگای موسڵ، هەروەها ئۆپەراسیۆنی كۆنترۆڵكردنەوەی شاری موسڵ لەلایەن هێزە چەكدارەكانی عێراقەوە. 
بەشداریكردووە لە رووماڵكردنی بەرفراوانی رووداو بۆ هێرشەكانی 16ی ئوكتۆبەری 2017ی هێزەكانی عێراق بۆ سەر كەركووك و ناڕەزایی خەڵك لەو هێرشانە، كاروانی دەیان هەزاری ئاوارەبوونی خەڵكی كەركووك و رووداوەكانی دوای هێرشەكانی 16ی ئوكتۆبەر. 
دەستپێكردنەوەی بەعەرەبكردنی پارێزگای كەركووك، یەكێكبووە لەو مژارانەی كە بوونەتە چیرۆكی ڤیتییەكانی هەردی محەممەد. ڤیتییەكانی لەسەر هەوڵەكانی دەركردنی كورد لە گوندەكانی یەنگیجەو داوودە، وایكرد هەڵوێستی گشتی دروستببێ و هەوڵی بەعەرەبكردنیان سەرنەگرێت. 
هەردی محەممەد خەڵكی كەركووكە و لە 2ی ئاداری 1987 لەدایكبووە. لەساڵی 2011 خوێندنی لە پەیمانگەی هونەرە جوانەكانی كەركووك تەواوكردووە. خێزاندارە و باوكی دوو كوڕە. 
ئەندامی سەندیكای رۆژنامەنووسانی كوردستانە. لەساڵی 2008 پەیامنێری كەناڵی كەركووك بووە. دوای ئەوە بووەتە پەیامنێری تەلەڤزیۆنی گەلی كوردستان. هەردوو زمانی كوردی و عەرەبی دەزانێت.