کار و کاروباری کۆمەڵایەتیی عێراق وردەکاریی پێدانی قەرز بە بێکاران ئاشکرا دەکات

 

رۆژی سێشەممە، 2-12-2025، حەسەن خەوام، گوتەبێژی وەزارەتی کار و کاروباری کۆمەڵایەتیی عێراق، بە تۆڕی میدیایی رووداوی راگەیاند: "ئامانج لەم دەستپێشخەرییە دابینکردنی هەلی کارە بۆ زۆرترین گەنجی بێکار و کەمکردنەوەی گوشارە لەسەر کەرتی گشتی."

 

بە گوێرەی ئەنجوومەنی وەزیرانی عێراق، قەرزەکە دەدرێت بەو بێکارانەی لە بنکەی زانیاریی وەزارەتدا تۆمارکراون بۆ کڕینی ئۆتۆمبێلی نوێی گواستنەوەی سەرنشین کە شوێنی 11 بۆ 21 کەسیان دەبێتەوە.

 

سەبارەت بە مەرجەکانی وەرگرتنی قەرزەکە، حەسەن خەوام دەڵێت: "پێویستە ئەو کەسە لە بنکەی زانیاریی فەرمانگەی کار وەک بێکار تۆمارکرابێت، تەمەنی لەنێوان 18 بۆ 55 ساڵ بێت و مۆڵەتی شۆفێریی هەبێت."

 

بە گوێرەی وەزارەتی کار و کاروباری کۆمەڵایەتیی عێراق، قەرزەکان هیچ سوودێکیان لەسەر نییە و دانەوەیان ساڵانە دەبێت، فەرمانگەی کار و راهێنانی پیشەیی لە رێگەی سندووقەکانی پڕۆژە بچووکەکانەوە سەرپەرشتیی دەستپێشخەرییەکە دەکات، بە هاوئاهەنگی لەگەڵ ئەو کۆمپانیایانەی ئۆتۆمبێلەکان بۆ گواستنەوەی فەرمانبەران، قوتابیان و خەڵک لە رێگەی ئەپڵیکەیشنێکی ئەلیکترۆنییەوە بەکاردەهێنن.

 

حەسەن خەوام هەروەها گوتی: "یەکێک لە لایەنە ئەرێنییەکانی ئەم دەستپێشخەرییە، کەمکردنەوەی قەرەباڵخیی هاتووچۆیە لە رێگەی هەماهەنگی لەگەڵ وەزارەت، زانکۆ و قوتابخانەکان بۆ گواستنەوەی بەکۆمەڵی فەرمانبەر و خوێندکارەکانیان، دابینکردنی هەلی کارە بۆ گەنجان و کەمکردنەوەی داواکاری دامەزراندنە".

 

رۆژی سێشەممە 2-12-2025 ئەنجوومەنی وەزیرانی عێراق کۆبووەوە، دەستپێشخەری وەزارەتی کار و کاروباری کۆمەڵایەتی بوو بۆ پێدانی قەرز بەو کەسە بێکارانەی کە ناویان لە وەزارەتەکە تۆمارکراوە، پەسندکرا.