نزیکەی 240 هەزار گەشتیار لە پشووەکانی سەری ساڵدا سەردانی هەرێمی کوردستانیان کردووە

 

ئومێد خۆشناو، پارێزگاری هەولێر ئەمڕۆ شەممە بە تۆڕی میدیایی رووداوی گوت: "لە پشووەکانی سەری ساڵدا 88 هەزار و 341 گەشتیار سەردانی ناوچەکانی پارێزگای هەولێریان کردووە".

 

گۆران قادر، گوتەبێژی بەڕێوەبەرایەتیی گەشتوگوزاری سلێمانی بە تۆڕی میدیایی رووداوی راگەیاند: "لە پشووەکانی سەری ساڵدا رۆژانە 8 هەزار گەشتیار سەردانی سلێمانییان کردووە و کۆی گەشتیاران بۆ سەری ساڵ بە زیاتر لە 70 هەزار گەشتیار مەزەندە دەکرێن".

 

گوتەبێژی گەشتوگوزاری سلێمانی دەڵێ، زۆرینەی ئەو گەشتیارانەی چوونەتە ناوچەکانیان دانیشتووانی نێوەڕاست و خواری عێراقن.

 

شەماڵ هرووری، گوتەبێژی گەشتوگوزاری دهۆک ئەمڕۆ بە تۆڕی میدیایی رووداوی گوت: "زیاتر لە 50 هەزار کەس لە پشووەکانی سەری ساڵدا سەردانی ناوچەکانی پارێزگاکەمانی کردووە".

 

گوتەبێژی گەشتوگوزاری دهۆک گوتی: "لەوانەی هاتوون پێنج هەزار کەسیان لە هۆتێلەکاندا ماونەتەوە، بەشێکیان ماوەیەکی کەم ماونەتەوە و سەردانی ناوچەکانی دیکەیان کردووە، بەشێکیان چوونەتە ئیدارەی سەربەخۆی زاخۆ".

 

هەورامان جەلال، بەڕێوەبەری راگەیاندن و پەیوەندییەکانی گەشتوگوزاری هەڵەبجە، ئەمڕۆ بە تۆڕی میدیایی رووداوی گوت: "لە پشووەکانی سەری ساڵدا نزیکەی 30 هەزار گەشتیار سەردانی ناوچە گەشتیارییەکانی سنوورەکەمانی کردووە".

 

بەڕێوەبەری راگەیاندنی گەشتوگوزاری هەڵەبجە گوتی، زۆرینەی گەشتیارەکانیان لە سنووری پارێزگاکانی نێوەڕاست و خوارووی عێراقەوە بووە.

 

تاوەکو ئەمڕۆ بە فەرمی هاتنی گەشتیاران لە تەواوی هەرێمی کوردستان نەدراوەتە دەستەی گەشتوگوزاری هەرێمی کوردستان. ئیبراهیم عەبدولمەجید، گوتەبێژی دەستەکە ئەمڕۆ بە تۆڕی میدیایی رووداوی گوت: "بۆ پشووەکانی سەری ساڵی 2025 نزیکەی 200 هەزار گەشتیار سەردانی هەرێمی کوردستانیان کردبوو".

 

 

ئومێد خۆشناو، پارێزگاری هەولێر، ئەمڕۆ لە راگەیێندراوێکدا ئەنجامی پلان و ئامادەکارییەکانی دامودەزگاکانی حکومەتی بۆ پێشوازیکردن لە ساڵی نوێ بڵاوکردەوە، کە لە ماوەی نێوان 25-12-2025 تاوەکو 1-1-2026 جێبەجێ کراون و رایگەیاند: "هیچ گرفتێکی ئەمنی و کارگێڕی" رووینەداوە".

 

لە راگەیێندراوەکەی ئەمڕۆدا پارێزگاری هەولێر رایگەیاندووە، لەو هەفتەیەدا 17 رووداوی هاتووچۆ بەهۆی خێرا لێخوڕین و پابەندنەبوون بە یاساکان تۆمارکراون، لە ئەنجامیاندا کەسێک گیانی لەدەستداوە و نۆ کەسیش برینداربوون.

 

بەگوێرەی راگەیێندراوەکەی پارێزگاری هەولێر، لە پشووەکانی سەری ساڵدا 86 رووداوی تاوانی جیاواز ئەنجامدراون، 85 یان بکەرانیان ئاشکرا کراون. هاوکات یەک رووداوی ئاگرکەوتنەوە هەبووە و تەنیا زیانی مادی لێکەوتووەتەوە.

 

لە بەشێکی دیکەی راگەیێندراوەکەدا ئاماژە بەوەکراوە، لە پشووەکانی سەری ساڵدا 5 هەزار و 486 نەخۆش سەردانی نەخۆشخانەکانیان کردووە. لە هەمان ماوەدا 294 منداڵ لەدایکبوون.

 

لە هەمان راگەیێندراودا هاتووە، "بەهۆی شەپۆلی بەفر و باران، تیمەکانی رێگەوبان بە 72 ئامێری جۆراوجۆرەوە لە ئەرکدا بوون. لەو ماوەیەدا 25 رێگەی سەرەکی لە سنووری کۆیە و قەزاکانی دیکە بە درێژایی 1,100 کیلۆمەتر راماڵدراون لە بەفر و 180 تۆن خوێ بۆ تواندنەوەی بەفر بەکارهێنراوە".