نرخی گەشتی عومرە دوو هێندە بەرز دەبێتەوە

 

 

ئێستا گەشتێکی ئاسایی بۆ ماوەی 10 رۆژ بۆ رێوڕەسمەکانی عومرە نزیکەی 500 دۆلارە بە رێگەی وشکانی و گەشتی ئاسمانی لە 900 بۆ هەزار دۆلارە، بەڵام هەردوو نرخەکە بۆ گەشتی مانگی رەمەزان، بەرزبوونەتەوە.

 

کاروان ستوونی، گوتەبێژی بەڕێوەبەرایەتیی گشتیی حەج و عومرەی هەرێمی کوردستان، ئەمڕۆ سێشەممە بە تۆڕی میدیایی رووداوی راگەیاند، بۆ مانگی رەمەزان نرخی گەشتی عومرە بە وشکانی دەگاتە نزیکەی هەزار دۆلار بۆ 10 رۆژ و بە ئاسمانی هەزار و 300 دۆلار.

 

گوتەبێژی حەج و عومرە گوتی: "عومرەکردن لە مانگی رەمەزاندا تایبەتە و موسڵمانان چێژی زیاتری لێ دەبینن، لەو مانگەدا لە هەموو جیهانەوە عومرەکاری زیاتر دەچنە سعودیە و بەهۆیەوە نرخەکان کەمێک بەرز دەبنەوە".

 

بەگوتەی کاروان ستوونی، لە مانگی رەمەزاندا لە سعودیە نرخی پێداویستییەکانی مانەوە لەو وڵاتە بەرز دەبێتەوە، لەوانە نرخی هۆتێل و خۆراک، ئەوەشی بە هۆکاری بەرزبوونەوەی نرخ زانی.

 

بەگوێرەی ئاماری بەڕێوەبەرایەتیی گشتیی حەج و عومرەی هەرێمی کوردستان، ساڵانە زیاتر لە 50 هەزار هاونیشتمانی لە هەرێمی کوردستانەوە بۆ رێوڕەسمەکانی عومرە دەچنە سعودیە.