ژمارەیەکی دیکە لە دەستگیرکراوانی لالەزار ئازاد کران؛ "سکرتێر و شۆفێرەکان لەنێویاندان"

 

قادر ئاغا مەنتک، یەکێک لە پارێزەرانی دەستگیرکراوانی لالەزار، ئەمڕۆ سێشەممە بە تۆڕی میدیایی رووداوی گوت، "چەند کەسێکی دیکە لە دەستگیرکراوانی لالەزار ئازاد كران، کە تاوەکو ئێستا 7 کەسن".

 

بە گوتەی ئەو پارێزەرە، یەکێک لەوانەی ئەمڕۆ ئازاد کراوە کەریم حاجی عەلی، شۆفێری تایبەتی لاهوور شێخ جەنگی بووە و پلە سەربازییەکەی عەقیدە، یەکێکی دیکەیان عەباس عەبدولقادر حەسەن، ئەویش بەهەمانشێوە شۆفێری لاهوور شێخ جەنگی بووە و پلەی ئەفسەری هەیە.

 

ئەو پارێزەرەی دۆسیەکە گوتی: "فەرمانی ئازادکردنی هەریەکە لە کاروان موحسین بایز و د. ئەحمەد فاتیح دەرکراوە، کە هەردووکیان سکرتێری لاهوور شێخ جەنگین و دوای رێکارە کارگێڕییەکان ئەوانیش ئەمڕۆ ئازاد دەکرێن".

 

تاوەکو ئەمڕۆ لە کاتی جیادا ژمارەیەک لە دەستگیرکراوانی لالەزار ئازاد کراون، لەنێویاندا 16-01-2026 چوار کەس و 13ـی هەمان مانگ 17 کەسی دیکە ئازاد کران.

 

‎12ی مانگی یەکی ئەم ساڵ، بۆ یەکەمجار لاهوور شێخ جەنگی برایە بەردەم دادوەر لە دادگەی سلێمانی و بەڵام دادوەر بڕیاری کۆتایی لە دۆسیەکەی نەدا و رایگەیاند، بۆ وردبینی دۆسیەکە رەوانەی دادگەی تێهەڵچوونەوەی هەرێمی کوردستان لە هەولێر دەکرێت.

 

‎شەوی 22ی ئابی 2025، هێزە ئەمنییەکانی سلێمانی، کە پێکهاتبوون لە هێزەکانی دژە تیرۆر، ئاسایش و کۆماندۆ، دوای ئەوەی لاهوور شێخ جەنگی رازینەبوو خۆی رادەست بکات، هێرشیان کردە سەر هۆتێل لالەزار، دوای سێ کاژێر رووبەڕووبوونەوە، لاهوور شێخ جەنگی و پۆڵادی برای و ئەندامانی هێزی چەکداری لاهوور شێخ جەنگی دەستگیرکران.