دوای 11 ساڵ لە کۆمەڵکوژیی شنگال؛ زیاتر لە 325 هەزار کوردی ئێزدی لە ئاوارەییدا دەژین

 

بەگوێرەی ئاماری نووسینگەی رزگارکردنی رفێندراوانی دەستی داعش، کە سەر بە نووسینگەی تایبەتی نێچیرڤان بارزانی، سەرۆکی هەرێمی کوردستانە: "زۆرینەی کوردانی ئێزدی ئێستاش لە ئاوارەییدا دەژین و نەیانتوانیوە بگەڕێنەوە سەر ماڵی پێشوویان".

 

بەگوێرەی ئامارەکە، "تاوەکو ئەمڕۆ 325 هەزار و 197 کوردی ئێزدی لە کەمپەکان یان ناوچە جیاکانی هەرێمی کوردستاندان. هەروەها ژمارەی ئاوارە ئێزدییەکان کە ئێستا لە کەمپەکانی هەرێمی کوردستانن 135 هەزار و 860 کەسن".

 

ئامارەکانی نووسینگەی رزگارکردنی رفێندراوانی دەستی داعش فەرمین و لەلایەن نەتەوە یەکگرتووەکانەوە باوەڕپێکراون.

 

لەدوای نەمانی دەسەڵاتی داعشەوە تاوەکو ئەمڕۆ، 93 گۆڕی بەکۆمەڵی کوردانی ئێزدی دۆزرانەتەوە، جگە لە دەیان گۆڕی تاکەکەسی.

 

لە هێرشی چەکدارانی داعشدا بۆ سەر شنگال و دەوروبەری لە 03ـی ئابی 2014، شەش هەزار و 417 کوردی ئێزدی رفێندران، سێ هەزار و 548 نێر و دوو هەزار و 869 مێ.

 

لە ئاماری نووسینگەی رزگارکردنی رفێندراوانی دەستی داعش هاتووە: "ئەوانەی تاوەکو ئەمڕۆ رزگارکراون 3 هەزار و 590 کەسن؛ هەزار و 211 ژن و 339 پیاو؛ هەزار و 76 کچی منداڵ و 964 کوڕی منداڵ".

 

بەگوێرەی ئاماری ئەو نووسینگەیە، تاوەکو ئەمڕۆ "تەرمی 274 شەهید دۆزرانەوەتەوە کە لەکاتی هێرشی داعشدا رفێندرابوون؛ 237 نێر و 37 مێ".

 

ئامارەکان ئاماژە بەوەش دەکەن، تاوەکو ئەمڕۆ دوو هەزار و 553 کەس لە کوردانی ئێزدی بێسەروشوێنن، کە هەزار و 329 نێر و هەزار و 224 مێن.

 

جگە لە جینۆسایدی کوردانی ئێزدی، چەکدارانی داعش 68 مەزار و شوێنی پیرۆزی کوردانی ئێزدییان تەقاندەوە.

 

لە هێرشی داعشدا بۆ سەر شنگال لە 3ی ئابی ساڵی 2014، داعش کوردانی ئێزدیی کۆمەڵکوژ کرد و 6 هەزار و 417 کەسیشی رفاند.

 

1090 رفێندراو دوای رزگاربوونیان، کە پێویستیان بە چارەسەری دەروونی بووە و لە چوارچێوەی بەرنامەیەکدا کە رێککەوتنێکی نێوان حکومەتی هەرێمی کوردستان و ئەڵمانیا بوو لە ساڵی 2015، نێردرانە ئەو وڵاتە بۆ چارەسەر.

 

لەدوای ئەو رێککەوتنەشەوە، ژمارەیەکی دیکە لە رزگارکراوان لە رێگەی رێکخراوە مرۆییەکانەوە چوونەتە وڵاتانی کەنەدا، ئەمریکا و ئوسترالیا.

 

بەگوێرەی نووسینگەی رزگارکردنی رفێندراوانی دەستی داعش، "ئەوانەی بۆ چارەسەری دەروونی دەچنە وڵاتانی دەرەوە، بۆ گەڕانەوە یان مانەوەیان لەو وڵاتە ئازادن، بیانەوێت دەگەڕێنەوە و نەیانەوێت دەمێننەوە."

 

لە هێرشی چەکدارانی داعشدا لە شنگال، 11 هەزار و 417 کوردی ئێزدی رفێندران، کۆمەڵکوژ و بێسەروشوێن کران.