لە سێوازی باکووری کوردستان تەرزە زیان بە ماڵ و موڵکی خەڵکی دەگەیێنێت

 

 

ئێوارەی رۆژی 2ـی ئەیلوولی 2023، شەپۆلێکی بەهێزی بارانی بەلێزمە، شارۆچکەکانی ئاڵتن یایڵا، کۆچگیری و گەمەرەکی لە پارێزگای سێواز گرتەوە و بووە هۆی بەرزبوونەوەی ئاستی ئاو لە چەند گەڕەک و کێڵگەیەکی گوندەکانی دەوروبەری شارۆچکەکان. 

 

دواتر لە شارۆچکەی ئاڵتن یایڵا، تەرزەیەکی زۆر باری و تەواوی شەقامەکانی لە ماوەیەکی زۆر کەمدا سپیپۆش کرد. خێرایی تەرزەبارین و گەورەیی قەبارەی تەرزەکە زیانی زۆری بە ئۆتۆمبێل و خانووبەرەی هاونیشتمانیان گەیاند. 

 

بەشێک لە هاونیشتمانییان، گرتەی ڤیدیۆیی کاتی تەرزەبارینەکانیان لە سۆشیاڵ میدیا بڵاوکردەوە و تێیدا دەردەکەوێت لە هەندێک شوێندا، قەبارەی تەرزەکان هێندەی هێلکەیەک دەبوو. 

 

هەرچەندە تەرزەبارینەکە 15 خولەکی خایاند، بەڵام تەواوی ناوچەکەی سپیپۆش کرد و زیانی زۆریشی بە موڵکی هاونیشتمانییان گەیاند. 

 

بەڕێوەبەرایەتیی گشتیی کەشناسی تورکیا بڵاویکردەوە، شەپۆڵی بارانبارینەکە ئەمڕۆ یەکشەممە، 3ـی ئەیلوولی 2023یش بەردەوام دەبێت و هەریەک لە پارێزگاکانی سێواز، قەرس، ئەرزەڕۆم و ئەردەخان-یش دەگرێتەوە و پێشبینی روودانی لافاو لە پارێزگای ئەرزەڕۆم دەکات.