بەهۆی رێکارەکانی کۆمیسیۆنەوە دوو بەربژێری هەڵوێست لە لیستەکە لادەبرێن

 

 

بڕیاربوو رەوتی هەڵوێست لە بازنەی پارێزگای سلێمانی 18 بەربژێری هەبێت، بەڵام لە لیستی کۆتایی ناوی بەربژێرانی پەسەندکراودا، ناوی 16 بەربژێری هەن. بەربژێرانی ژمارە 15 و 17 نین.

 

د. رێبوار کەریم، یەکێک لە بەرپرسانی باڵای رەوتی هەڵوێست، ئەمڕۆ هەینی بە تۆڕی میدیایی رووداوی گوت: "ئەو دوو بەربژێرەمان بڕوانامەی دکتۆرایان هەبوو، بەڵام لە دەرەوەی وڵات دەژین و یەکسانکردنی بڕوانامەیان لە عێراق نەکردبوو، بۆیە نەیانتوانی بەردەوامبن".

 

بە دروشمی "متمانە نادۆڕێنین" رەتی هەڵوێست بانگەشەی هەڵبژاردنی دەستپێکردووە و لە پارێزگاکانی سلێمانی، هەولێر و دهۆک بەربژێریان هەیە.

 

بەربژێرانی رەوتی هەڵوێست، 12یان لە هەولێر، 16 لە سلێمانی و چوار لە دهۆکن.

 

ئەمڕۆ بانگەشەی هەڵبژاردنی پەرلەمانی عێراق دەستیپێکرد و بڕیارە 11-11-2025 دەنگدانی گشتی بەڕێوەبچێت.