کەجەکە داوا دەکات پشتیوانییەکان بۆ رۆژئاوای کوردستان بەردەوام بن

 

 

بەپێی راگەیێندراوەکەی کەجەکە، لە 4ـی کانوونی دووەمی 2026دا رێککەوتنێکی گرنگ لەنێوان شاندی بەڕێوەبەرایەتیی خۆسەر و حکومەتی دیمەشق لە ئارادا بوو، "بەڵام وەزیری دەرەوەی دیمەشق دەستوەردانی کرد و کۆبوونەوەکەی بەبێ ئەنجام کۆتایی پێ هێنا. دواتر لە 5ـی کانوونی دووەمدا، لە پاریس کۆبوونەوەیەک لەنێوان ئەمریکا، فەرەنسا، تەحریری شام (HTS) و تورکیا کرا و لە 6ـی کانوونی دووەمدا هێرشی قورس کرایە سەر گەڕەکە کوردنشینەکانی حەلەب."

 

کەجەکە دەڵێ: "ئەمە پیلانگێڕییەکی نێودەوڵەتی بوو دژی سیستمی دیموکراسی لە باکوور و رۆژهەڵاتی سووریا، لە بەرامبەردا باشووری سووریا بۆ ئیسرائیل جێهێڵدرا." ئامانجی ئەم هێرشانە "تێکدانی ئەو پێکەوەژیانە" بوو کە کورد لەگەڵ عەرەب، سریانی، چەرکەس و پێکهاتەکانی دیکە دروستی کردبوو.

 

 

کەجەکە ئاماژە بەوە دەکات: "پیلانگێڕان ویستوویانە شەڕی کورد و عەرەب هەڵگیرسێنن،" بەڵام هێزەکانی سووریای دیموکرات (هەسەدە) بە کشانەوەیان لە دێرەزوور، رەققە و تەبقە، ئەو "دنەدانەیان" پووچەڵ کردەوە و نەیانهێشت ئامانجی هێرشکاران بەدی بێت.

 

لە راگەیێندراوەکەدا هاتووە، عەبدوڵڵا ئۆجەلان، رێبەری زیندانیکراوی پەکەکە، پێش 4ـی کانوونی دووەم پڕۆژەیەکی چارەسەری بە ناوی "تێکەڵبوونی دیموکراسی" پێشکێشی خۆسەر کرد و "دوای تێکدانی ئەو پڕۆژەیە، ئۆجەلان بە هەموو رێگەیەک هەوڵی دا بۆ راگرتنی شەڕ، کە دواجار بووە هۆی واژۆکردنی رێککەوتنی 30ـی کانوونی دووەم."

 

 

کەجەکە ستایشی کاریگەریی "سەرهەڵدان و دەرکەوتن"ـی گەلی کورد دەکات و دەڵێ:

 

باکووری کوردستان: وەک ساڵی 2014 بۆ کۆبانێ، شارەکانی ئامەد، وان، ئێلێهـ، جزیری و گەورەشارەوانییەکانی تورکیا هەستانە سەر پێ.

 

باشووری کوردستان: گەل بە جۆشێکی زۆرەوە هاتنە مەیدان. کەجەکە دەڵێ، گەنجانی باشوور تەنیا لە مەیدان نەبوون، بەڵکو چەکیان هەڵگرت و چوونە شەڕ. 

 

رۆژهەڵاتی کوردستان: سەرەڕای گوشار و قوربانییەکانی ناوخۆی ئێران، گەنجانی رۆژهەڵاتی کوردستان بەشداری چەكهەڵگرتنی رۆژئاوای کوردستان بوون.

 

ئەورووپا و جیهان: لە ئوسترالیاوە تاوەکو کەنەدا، کوردان ویژدانی مرۆڤایەتییان هەژاند.

 

 

کەجەکە دەڵێ: "یەکێتیی نەتەوەیی لەسەر ئاستی جەماوەری و کۆمەڵایەتی پێکهاتووە و ئێستا ئەرکی هێزە سیاسییەکانە کە ئەم یەکێتییە لەسەر ئاستی دامەزراوەیی و سیاسی رێکبخەن." 

 

کەجەکە ئامادەیی تەواوی خۆی نیشان داوە بۆ هەر هەنگاوێک لە پێناو یەکێتیی نەتەوەیی.

 

 

لە کۆتاییدا کەجەکە هۆشداری دەدات کە "کات دەریدەخات ئایا ئەم ئاگربەستە هەمیشەیی دەبێت یان نا. بۆیە داوا لە گەل و هێزە دیموکراسیخوازەکان دەکەین تاوەکو ئەو کاتەی دۆخی رۆژئاڤا بە تەواوی روون دەبێتەوە و مافەکانیان گەرەنتی دەکرێن، پشتیوانییەکانیان بە شێوەیەکی هەمیشەیی بەردەوام بکەن" و دەڵێ: "گەلێک پشت بە هێزی خۆی ببەستێت و یەکێتیی خۆی بپارێزێ، دەتوانێت هەموو ئاستەنگەکان تێکبشکێنێت."