تەقینەوەی گاز لە تەورێز بووە هۆی گیانلەدەستدانی سێ ئەندامی یەک خێزان

 

ئەمڕۆ چوارشەممە 4ی شوباتی 2026، هاونیشتمانییەک لە شاری بۆکانی رۆژهەڵاتی کوردستان بە تۆڕی میدیایی رووداوی راگەیاند، رووداوەکە لە شاری تەورێز روویداوە و قوربانییەکان خەڵکی گوندی (مەحموودئاوا)ی سەر بە شاری بۆکانن.

 

بەگوێرەی زانیارییەکان، ئەو سێ کەسەی گیانیان لەدەستداوە پێکهاتوون لە باوک، دایک و کوڕێک بەناوەکانی عەلی عەلیزادە (باوک)، شەهێن ئەقدەسی (دایک) و مەحموود عەلیزادە (کوڕ).

 

سەرچاوەکەی رووداو ئاماژەی بەوەش کرد، لەو رووداوەدا (مەهدیە مەدامی) کە دەکاتە بووکی خێزانەکە، بە سەختی بریندار بووە و ئێستا لە یەکێک لە نەخۆشخانەکانی تەورێز لەژێر چاودێریی چڕدایە.

 

رووداوەکانی پەیوەست بە گاز لە ئێران و رۆژهەڵاتی کوردستان ساڵانە قوربانی لێدەکەوێتەوە. 

 

بەپێی دوایین ئاماری رێکخراوی فریاکەوتنی تەندروستیی ئێران، لە ماوەی 10 ساڵدا نزیکەی 1000 کەس لەو وڵاتە بەهۆی ژەهراویبوون و تەقینەوەی گاز گیانیان لەدەستداوە و 7 هەزار کەسی دیکەش بریندار بوون.