شیلان لەنێوان ژیان و مردندایە؛ "خوێنێکیان داوەتێ هی خۆی نییە" و لێکۆڵینەوە دەکرێت

 

 

حاجی یاسین گوللی، برای هاوژینەکەی شیلان دەڵێت، "ئەو [کارمەندەی] پسووڵەی بۆ هێناین، گوتی: ئەمە دوو جۆر خوێنە بۆ یەک نەخۆش براون. [ناو و جۆری خوێنەکانی] لای خۆی تۆمار کردبوو، گوتی A+یش براوە و B+یش براوە. [پرسیمان] ئەمە چییە؟ گوتی: پێی بڵێن با جۆری خوێنەکەی دڵنیا بکاتەوە. خوێنی خۆی B+ـە. نەشتەرگەرییەکە بە سەرکەوتوویی کۆتاییهات. ناوی پزیشکەکە ئاوانە. [پزیشکەکە] لە دەرەوە هات و پرسی جۆری خوێنەکەی چییە؟ گوتمان B+ـە. پزیشکەکەش یەکسەر چووە ژوورەوە، پێی گوتبوون: من پێم گوتن لەم بتڵە خوێنە بدرێت، کەچی دەرکەوت A+ـە. رەنگە A+ی پێدرابێت، ئێمە نازانین، چونکە لە ژوورەوە نەبووین؛ بەڵام هەردوو بتڵەکە لای ئەوان بوون."

 

لە زانستی پزیشکیدا، وەرگرتنی خوێنی نەگونجاو دەبێتە هۆی تێکشکانی خڕۆکە سوورەکانی خوێن، بە رێژەی جیاواز کاریگەریی لەسەر گورچیلەکان و گوشاری خوێن دروست دەکات. تاوەکو دەگاتە حاڵەتی سەرئێشە، بێهێزی و بێهۆشی."

 

د. رۆژهات عەبدولستار، پسپۆڕی نەخۆشییەکانی خوێن دەڵێت، "ئەوە پەیوەستە بەوەی چەند کات تێپەڕیوە تا پزیشکەکەی پێی زانیوە کە ئەم جۆرە [خوێنە] هی ئەو نییە. هەروەها پەیوەستە بە چەند شتێکی دیکەوە؛ ئایا پێشتر نەخۆشەکە جارێکی دیکە خوێنی وەرگرتووە کە لە جۆری [خوێنی] خۆی نەبووبێت؟ ئەگەر جاری یەکەمی بێت، مەترسییەکان کەمتر دەبن. سەرباری ئەمە، ئایا نەخۆشەکە نەخۆشیی دڵ و دابەزینی [گوشاری] خوێنی هەیە یان نا، [نەخۆشیی] درێژخایەنی هەیە یان نا. ئەگەر ئەمانە نەبن، ئەگەر هەموو ئەمانە نەبن، بە ویستی خودا و دوای وەرگرتنی چارەسەری پێویست، بە خێراترین کات هەڵدەستێتەوە."

 

بەگوێرەی بەڕێوەبەرایەتیی تەندروستیی زاخۆ، لیژنەیەک بۆ بەدواداچوونی ئەو کەیسە پێکهێندراوە، کە لە 5 پزیشک پێکدێت. هەموو ئەو کارمەندانەی شەوی 1ی ئایار لە ئەرکدا بوون، لەژێر لێکۆڵینەوەدان؛ لایەنی کەمتەرخەم سزا دەدرێت. تاوەکو کاتی ئامادەکردنی ئەم هەواڵە، شیلان هێشتا بێهۆشە و تەندروستیی منداڵەکەشی جێگیرە.