نموونەی خوێن لە کەسوکاری ئەنفالکراوانی چەمچەماڵ وەردەگیرێت؛ 'هەموو رۆژێک مردنێکە بۆمان'

 

ئەوانەی نموونەی خوێنیان لێوەردەگیرێت، لانیکەم 5 کەس لە خێزانەکەیان تاوەکو ئێستا لە گۆڕە بەکۆمەڵەکانی خوارو و ناوەڕاستی عێراقن و دەیانەوێت رووفاتی کەسوکاریان بگەڕێندرێتەوە زێدی خۆیان.

 

یەکێک لە کەسوکاری ئەنفالکراوان دەڵێت، ئێمە تەنیا چاوەڕوانی ئەوە دەکەین رووفاتەکانمان بۆ بهێننەوە، چونکە هەموو رۆژێک مردنێکە بۆمان."

 

هاوکار جەمیل، کەسوکاری ئەنفالکرانە و باس لەوە دەکات، "داواکاری سەرەکی ئێمە گەڕانەوەی رووفاتەکانە بۆیە داواکارین هەرچی زووە، کاری گەڕانەوەی رووفاتەکان تەواو بکەن."

 

زارا عبدولقادر، یەکێکی دیکەیە لە کەسوکاری ئەنفالکراوان و ئاماژە بەوە دەدات، "تەنیا ئەوەمان دەوێت گۆڕێک هەبێت و دڵنیابین هی کەسوکارمانە."

 

لە ماوەی ساڵێک و چوار مانگدا، پزیشکی دادی عێراق و فەرمانگەی پاراستنی گۆڕە بەکۆمەڵەکان نموونەی خوێنی دوو هەزار و 500 کەسوکاری ئەنفالکراوانیان وەرگرتووە. کارەکە بۆ ئەوەیە پشکنینی (DNA)ـیان بۆ بکەن و هاوتای بکەن لەگەڵ ئەو رووفاتانەی لە گۆڕە بەکۆمەڵەکان دۆزراونەتەوە.

 

هابیل حاجی ئەحمەد، بەرێوەبەری مۆنۆمێنتی ئەنفال لە چەمچەماڵ دەڵێت، "ئەم تیمە 7 جارە دێنە کوردستان و سێ جار لە چەمچەماڵ بوون و بریارە لە چەند رۆژی داهاتو دیسانەوە بگەڕێنەوە چەمچەماڵ و تاوەکو  9ـی مانگ بەردەوام دەبێت."

 

قۆناخ بە قۆناخ پرۆسەی وەرگرتنی نموونەی خوێن لە هەرێمی کوردستان بەردەوام دەبێت لە چەمچەماڵ و گەرمیان و شوێنەکانی دیکە، تاوەکو ئەو کاتەی زۆرترین نموونەی وەردەگیرێن دواتر پشکنینەکان بەراورد دەکرێن و هەر رووفاتە و بۆ زێدی خۆی و لای کەسوکاری خۆی دەگەرێندرێتەوە.