ئاگرێکی گەورە لە بەنزینخانەیەکی هەولێر کەوتەوە

رووداو دیجیتاڵ

بەنزینخانەی (لاپ) لە گەڕەکی فەرمانبەرانی هەولێر لەکاتی بەتاڵکردنەوەی بەنزیندا ئاگری گرت.

جەنگی مەجید، بازرگانی سووتەمەنی و خاوەنی بەنزینخانە لە شاری هەولێر بە تۆڕی میدیایی رووداوی گوت، "بەنزینخانەکە بەنزینی حکومیی 750 دیناری دابەش دەکات، ئەمڕۆ بەنزینی بۆ چووە و لەکاتی بەتاڵکردنەوەیدا ئاگر تێیدا کەوتووەتەوە."

ئەو بازرگانەی سووتەمەنی، کە ئاگاداری رووداوەکەیە، گوتیشی، "ئەو بەنزینەی ئەمڕۆ بۆ بەنزینخانەکە چووە، سبەی دابەش دەکرا. ئەمڕۆ دابەشکردن نەبووە و بەنزینخانەکە چۆڵ بووە، ئەوەش هۆکارە کە زیانی کەمتر هەبێت."

 

بە گوتەی جەنگی مەجید، زیانی مادی زۆرن، تانکەر و زۆرینەی بەنزینخانەکە سووتاون؛ ئاماژەی بەوەش کرد، "هێشتا روون نییە زیانە گیانییەکانی چی بوون."

تیمەکانی بەرگریی شارستانیی هەولێر سەرقاڵی کۆنترۆڵکردنی ئاگرەکەن.

بەپێی ئەو گرتە ڤیدیۆییانەی هاونیشتمانییان بۆ رووداویان ناردووە، ئاگر و دووکەڵێکی چڕ لە بەنزینخانەکە بەرزدەبێتەوە.