وەزیری ناوخۆی تورکیا: دەستبەسەر یەک تۆن مادەی هۆشبەردا گیرا

عەلی یەرلیکایا، وەزیری ناوخۆی تورکیا رایگەیاند، هێزەکانی وەزارەتەکەی هەڵمەتێکیان لە 44 پارێزگای باکووری کوردستان و تورکیا ئەنجامداوە و تێیدا دەستبەسەر 1.1 تۆن مادەی هۆشبەردا گیراوە و 176 کەسیش دەستگیرکراون. 

 

یەرلیکایا باسی لەوەکرد، هەڵمەتەکە لە پارێزگاکانی ئەرزەڕۆم، رووها، دیلۆک، ئێلیە، مەلەتی، ئاگری، وان، شرنەخ، خارپێت، بەدلیس، مەرەش، سێرت، کیلیس، ئامەد و جۆلەمێرگی باکووری کوردستان و ئیستەنبووڵ، ئیزمیر، ئادانا، دەنیزلی، ئەنتاڵیا، ئەنقەرە، گیرەسون، ساکاریا، کۆنیا، کوتاهیا، کڕشەهیر، ئافیۆن، سامسون، عوسمانییە، کارامان، بۆڵو، کڕکڵارئێلی، بورسا، تۆکات، ئەسکیشەهیر، موغڵا، یالۆڤا، تەکیرداغ، هاتای، کایسەری، کۆجائێلی، سینۆپ، مەرسین و دوزجەی تورکیا ئەنجامدراوە. 

 

وەزیری ناوخۆی تورکیا ئاماژەی بەوەشکرد، مادە هۆشبەرەکە لە چەند جۆرێکی جیاواز بووە بە جۆرێک 846 کیلۆگرام مێتامفاتین؛ 223 کیلۆگرام سکونک؛ 11 کیلۆگرام کۆکایین؛ 15 کیلۆگرام حەشیش؛ 5 کیلۆگرام ماریوانا؛ 0.5 کیلۆگرام ئیرۆیین؛ 35 هەزار دانە حەبی کیپتاگۆن بووە.

 

عەلی یەرلیکاکا گوتیشی، هەر لەو هەڵمەتەدا 176 کەس بە تۆمەتی بازرگانیکردن و بەکارهێنانی مادەی هۆشبەر دەستگیرکراون و دەست بەسەر 14 دەمانچە، چوار کلاشنکۆف و بڕێکی زۆر پارەیشدا گیراوە.