تورکیا هەواڵی کوژرانی 47 سەربازی لە هەرێمی کوردستان رەتدەکاتەوە

 

 

سەنتەری بەرەنگاربوونەوەی زانیاریی نادروست لە سەرۆکایەتیی فەرمانگەی پەیوەندییەکانی سەرۆکایەتیی کۆماری تورکیا راگەیێندراوێکی بڵاوکردەوە و تێیدا هاتووە، لە تۆڕە کۆمەڵایەتییەکاندا گرتە ڤیدیۆیەک بڵاوکراوەتەوە، گوایە هێزێکی سەر بە سوپای تورکیا کراوەتە ئامانج و 47 سەرباز کوژراون.

 

سەنتەرەی بەرەنگاربوونەوەی زانیاریی نادروست لە سەرۆکایەتیی فەرمانگەی پەیوەندییەکانی سەرۆکایەتیی کۆماری تورکیا دەڵێت، ئەو هەواڵە دوورە لە راستییەوە و رووداوی وەها رووینەداوە.

 

لە بەشێکی دیکەی راگەیێندراوەکەدا هاتووە، گرتە ڤیدیۆییەکە لە ساڵی 2019 لەلایەن وەزارەتی بەرگریی تورکیاوە بڵاوکراوەتەوە و شوێنەکەش ناوچەی خواکوڕکە لە هەرێمی کوردستان، تێیدا هێزێکی سوپای تورکیا سەرقاڵی کێوماڵکردنی رێگەکان بووە و دواتر چەند حەشارگەیەک و ئەشکەوتی پەکەکەی تەقاندەوە. هەروەها رایگەیاندووە، "بەڵام ئەو گرتە ڤیدیۆییە مۆنتاژ کراوە و دیمەنێک زیاد کراوە" کە گوایە گەریلاکانی پەکەکە بە رۆکێتێکی کورتمەودا ئەو هێزە دەکەنە ئامانج.

 

لە راگەیێندراوەکەدا هاتووە، ئەم هەواڵە راست نییە و گرتە ڤیدیۆیەکەش پڕوپاگەندەیە و لە تۆڕە کۆمەڵایەتییەکان بڵاوکراوەتەوە و نابێت بایەخی پێبدرێت.

 

نزیکەی 30 ساڵە تورکیا و پەکەکە لە هەرێمی کوردستان شەڕی یەکدی دەکەن. دوایین زنجیرە ئۆپەراسیۆن تورکیا رایگەیاندووە ناوی ناوە چنگ- قوفڵ، کە بەرەبەیانی رۆژی 18ی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.

 

وەزارەتی بەرگریی تورکیا گیانلەدەستدانی 647 گەریلا و کوژرانی 113 سەربازی سوپای وڵاتەکەی لە چوارچێوەی ئەم ئۆپەراسیۆنە راگەیاندووە؛ هەپەگەش کوژرانی سێ هەزار و 63 سەربازی تورکیا و گیانلەدەستدانی 398 گەریلای راگەیاندووە.