گەنجێک بۆ کڕینی جلی جەژن دەچێتە سلێمانی و لە رێگەدا دەکوژرێت

 

ئەو گەنجەی کە بە دەستڕێژی گولـلە گیانی لەدەستداوە ناوی ئەمیر تەهایە. رێبین عومەر، بەڕێوەبەرى ناحیەى بەرزنجە بە تۆڕى میدیایی رووداوى راگەیاند، "ئەو گەنجە لەگەڵ برایەکى و هاوڕێیەکى دیکەى چوون بۆ سلێمانى بۆ کڕینى جلوبەرگى جەژن، دواى گەڕانەوەیان لە نزیک گوندى دەرەتەتى نزیک لە بەرزنجە، لەناو ئۆتۆمبێلێکەوە تەقەیان لێدەکرێت و یەکێک لە گەنجەکان کە تەمەنی 20 ساڵە دەکوژرێت، برا و هاوڕێکەشى بریندار دەبن."

 

لەبارەى ناسنامەى تەقەکەرەکان، رێبین عومەر دەڵێت، "تاوەکو ئێستا نازانین تەقەکەر کێیە، بەڵام دەستمان بە لێکۆڵینەوە کردووە و بنەماڵەى کوژراوەکە خێزانێکى بێ کێشەبوون."

 

بەپێى ئامارەکانى وەزارەتى ناوخۆى هەرێمى کوردستان، رێژەى کوشتن و خۆکوشتن لە 4 مانگى ئەمساڵ بەراورد بە هەموو 2020، زیادى کردووە، بە جۆرێک کە خۆکووشتن 25% و کووشتنیش 225% زیاتر بوون هۆکارى زۆرینەشیان، کێشەى کۆمەڵایەتییە.