لە کەرکووک بوومەلەرزە روویدا

 

 

عامر جابری، گوتەبێژی دەستەی کەشناسی و بوومەلەرزەزانیی عێراق، ئەمڕۆ سێشەممە 5ی ئایاری 2025 بە تۆڕی میدیایی رووداوی گوت، بوومەلەرزەکە کاژێر 6:21 خولەکی ئێوارەی ئەمڕۆ بە دووریی 26 کیلۆمەتر لە باکووری رۆژهەڵاتی پارێزگای کەرکووک تۆمار کراوە.

 

گوتەبێژی دەستەی کەشناسی و بوومەلەرزەزانیی عێراق دەڵێت، "گوڕی بوومەلەرزەکە 3.6 پلە و قووڵاییەکەشی 10 کیلۆمەتر بووە، بەڵام زیانی نەبووە."

 

کاژێر 04:53 خولەکی ئێوارەی سێشەممەی هەفتەی رابردوو 29ی نیسانی 2025 بوومەلەرزەیەک بە دووریی 40 کیلۆمەتر لە باکووری پارێزگای کەرکووک تۆمار کرا، گوڕەکەی 2.8 پلە و قووڵاییەکەشی 10 کیلۆمەتر بووە، بەڵام زیانی نەبوو.

 

دەستەی کەشناسی و بوومەلەرزەزانیی عێراق، مانگی رابردوو 60 بوومەلەرزەیان تۆمارکرد، کە 16یان لە باشووری کوردستان روویاندا، گوڕی بوومەلەرزەکان لەنێوان 1 تاوەکو 4.1 پلەی رێختەر بوون و زیانی گیانییان نەبوو.

 

شەش بوومەلەرزەیان لە پارێزگاکانی سلێمانی و هەڵەبجە، سێ بوومەلەرزەیان لە پارێزگای دهۆک، دوو بوومەلەرزەیان لە پارێزگای هەولێر، سێ دانەیان لە پارێزگای کەرکووک و دووانەکەی دیکە لە خانەقین لە پارێزگای دیالە بوون.