هاتووچۆی هەولێر: هاتووچۆی بارهەڵگر و مۆتۆڕسکیل لە ناوچە گەشتیارییەکان لە دوو رۆژی هەفتە قەدەخەیە

 

رۆژی سێشەممە، 05ـی ئایاری 2026، بەڕێوەبەرایەتیی هاتووچۆی هەولێر لە راگەیێندراوێکدا شۆفێرانی بارهەڵگر و مۆتۆڕسکیلی ئاگادارکردەوە کە لەپێناو بەرژەوەندیی گشتی و دروستنەبوونی جەنجاڵی لە ناوچە گەشتیاری و سەیرانگاکان، بڕیاردراوە بە قەدەخەکردنی هاتووچۆی ئۆتۆمبێلی بارهەڵگر و مۆتۆڕسکیل لەو رێگایانەی بە ناوچە گەشتیارییەکاندا تێدەپەڕن.

 

بەگوێرەی بڕیارەکە، قەدەخەی هاتووچۆ لەم کاتانەدا دەبێت:

 

رۆژانی پێنجشەممە: لە کاژێر 12:00ـی نیوەڕۆ تاوەکو 01:00ـی شەو.

 

رۆژانی هەینی: لە کاژێر 07:00ـی بەیانی تاوەکو 01:00ـی بەرەبەیان.

 

هاتووچۆی هەولێر دەڵێ: "هەر بارهەڵگرێک لەو کاتانەی کە هاتووچۆ تێیاندا قەدەخەیە بە رێگەکاندا بڕوات، ئەوا لە رێگەی کامێراکانەوە سزای دارایی بۆ تۆمار دەکرێ."

 

هاتووچۆی هەولێر داوا لە شۆفێرانی بارهەڵگر و مۆتۆڕسکیل دەکات پابەندی بڕیارەکە بن، ئەوەش لەپێناو دابینکردنی هاتووچۆیەکی سەلامەت بۆ گەشتیاران و دوورکەوتنەوە لە هەر رووداوێکی نەخوازراو.