بۆ جاری دووەم لە هەفتەیەکدا لە دەربەندیخان دەست بەسەر ژمارەیەک چەک و تەقەمەنیدا گیرا

 

 

ئەمڕۆ پێنجشەممە، پۆلیسی پارێزگای سلێمانی رایگەیاند، دوای لێکۆڵینەوەکانی پۆلیس، شوێنی چەك و تەقەمەنییەكان ئاشکرا کراون و دەستگیراوە بەسەریاندا.

 

سلێمان محەممەد، قایمقامی قەزای دەربەندیخان لە پارێزگای سلێمانی بە تۆڕی میدیایی رووداوی گوت: "لە ماوەی رابردووشدا رووداوی هاوشێوە هەبوون، ئەمە و ئەوەی پێشووتریش هیچ پەیوەنیدییان بە کاری تیرۆرەوە یان رێکخراوی هاوشێوە نییە".

 

پۆلیسی سلێمانی ئاماژەی بە ناسنامەی تۆمەتبارەکە کردووە و رایگەیاندووە، ناوی (ص، گ)ـە و بە بڕیاری دادوەر و بەگوێرەی مادەی 13 لە یاسای چەكی ژمارە 2ـی ساڵی 2022 ی بەركار لە هەرێمی كوردستان راگیراوە.

 

قایمقامی دەربەندیخان گوتی، "شارەکەمان یەکێکە لە ئارامترین ناوچەکان؛ کەمترین رووداوی کۆمەڵایەتی تێدایە و بە چەندین مانگ رووداوی تەقەکردن لەم شارەدا روونادات، بۆیە دڵنیایی دەدەینە خەڵک کە ئاسایشی هەمووان پارێزراوە".

 

هەر ئەمڕۆ بەرپرسێکی باڵا لە دەربەندیخان بە رووداوی گوت: "ئەوەی دەستبەسەر کراوە کاری کڕین و فرۆشتنی چەک دەکات و ئەوەش لە هەموو شارەکاندا هەیە نەوەکو تەنیا دەربەندیخان".

 

بەگوێرەی ئەو وێنەیەی پۆلیسی سلێمانی بڵاویکردووەتەوە، چەکێکی کڵاشینکۆف، چەند جۆرێک دەمانچە و فیشەک دەستیان بەسەردا گیراوە.

 

ئەوە لەکاتێکدایە، 28ـی ئەم مانگە، لە ماڵێکی گەڕەکی بانیخێڵانی دەربەندیخان دەست بەسەر بڕێکی زۆر لە چەک و تەقەمەنیدا گرا، لەنێویاندا تی ئێن تی هەبوون.

 

بەرپرسە ئەمنییەکەی دەربەندیخان ئەمڕۆ بە رووداوی گوت: "ئەوەی لەسەر هەبوونی چەکەکانی 28ـی مانگی رابردوو دەستگیرکراوە، کەسێکە لە رووی دەروونییەوە تەواو نییە و خەڵکی گەڕەکەکەش دەیناسن".