قایمقامی سۆران: دەروازەی زێت بە هاوئاهەنگیی پارێزگای وان فراوانتر دەکەین

مالیک محەممەد
 
رووداو دیجیتاڵ

شاندێکی ئیدارەی سەربەخۆی سۆران بە سەرۆکایەتیی هەڵگورد شێخ نەجیب، سەرپەرشتیاری ئیدارەی سەربەخۆی سۆران و شاندێکی یاوەری سەردانی ژووری بازرگانیی پارێزگای وانی باکووری کوردستانی کرد. قایمقامی سۆران، کە ئەندامێکی شاندەکەیە، دەڵێت، "باس لە فراوانکردن و گەیاندنی خزمەتگوزاری زیاتر بە دەروازەی زێت کرا."
 
فەرمانگەی راگەیاندن و پەیوەندییەکانی دەروازەی زێت بڵاویکردەوە، "کۆبوونەوەکی گرنگ لەنێوان هەردوولا کرا کە چۆنییەتی گەشەپێدانی پەیوەندییە ئابوورییەکان، تەوەری سەرەکی بوو."
 
فەرمانگەی راگەیاندن و پەیوەندییەکانی دەروازەی زێت ئاماژەی بەوە کردووە، "لە کۆبوونەوەکەدا تیشک خرایەسەر فراوانکردنی دەروازەی نێودەوڵەتیی زێت، بەشێوەیەکی مۆدێرن و ستاندارد."
 
رەجەب زوبێر، قایمقامی قەزای سۆران بە رووداوی گوت، "لە پارێزگای وان لەگەڵ ژووری بازرگانی کۆبوونەوەمان کرد و بەڵێنیان دا لە سنووری خۆیانەوە خزمەتگوزاری زیاتر بگەیێننە دەروازەی زێت و بە هاوئاهەنگیش کاری فراوانکردنی زیاتری دەروازەکە دەکەین."
 
رەجەب زوبێر گوتی، "لە دیوی هەرێمی کوردستانەوە چەندین خزمەتگوزاری گەیێندراوەتە دەروازەکە، جگە لە قیرتاوکردنی رێگەکەی، چونکە دەروازەی زێت بە رێگەیەکی سەرەکی پەیوەندییە بازرگانییەکان و پێشخستنی بواری ئابووری و بازرگانی لەنێوان هەرێمی کوردستان و کۆماری تورکیا دادەنرێت."
 
 
قایمقامی سۆران گوتی، "بایەخدان بەم دەروازەیە خزمەتێکی زۆر بە شادەماری ئابووری و پەیوەندییەکانی حکومەتی هەرێمی کوردستان دەکات."
 
لە راگەیێندراوەکەی فەرمانگەی راگەیاندن و پەیوەندییەکانی دەروازەی زێتدا هاتووە، "لە دیدارەکەدا شاندی سۆران بانگهێشتی وەبەرهێنەران و ئەندامانی ژووری بازرگانی وانی کرد بۆئەوەی سەردانی دەڤەری سۆران بکەن، بەمەبەستی بینینی دەرفەتەکانی سەرمایەگوزاری، لەپێناو ئەوەی لە چەندین بواری جیاجیادا وەبەرهێنان بکەن و سەرمایەکانیان بەگەڕبخەن." 
 
رۆژی 10ـی ئایاری 2023، دەروازەی سنووری زێت کە دەکەوێتە سنووری قەزای مێرگەسۆر لە پارێزگای هەولێر لەگەڵ پارێزگای جۆلەمێرگی باکووری کوردستان لەنێوان هەرێمی کوردستان و باکووری کوردستان و تورکیادا کرایەوە.