سەرچاوەیەک لە وەزارەتی دارایی: چاوەڕێی بڕیاری خەرجکردنی مووچەی مانگی ئابین بۆ ناردنی داهاتی نانەوتی

 

رۆژی یەکشەممە، 05ـی تشرینی یەکەمی 2025، سەرچاوەیەک لە وەزارەتی دارایی هەرێمی کوردستان بە تۆڕی میدیایی رووداوی راگەیاند: "چاوەڕێی بەغدا دەکەین. هەر کاتێک بڕیاری خەرجکردنی مووچەی مانگی 8ـی فەرمانبەرانی هەرێمی کوردستان درا، داهاتی نانەوتی دەخەینە سەر هەژماری وەزارەتی دارایی عێراق".

 

حکومەتی هەرێمی کوردستان بۆ مانگەکانی ئایار، حوزەیران و تەمموز 120 ملیار دیناری وەک داهاتی نانەوتی خستەسەر هەژماری وەزارەتی دارایی عێراق. 

 

بڕی داهاتی نانەوتی بۆ مانگی ئاب یەکلایی نەکراوەتەوە و چاوەڕێی گفتوگۆی شاندەکانی عێراق و هەرێمی کوردستانە، بەڵام چاوەڕوان دەکرێ بە 100 تاوەکو 120 ملیار دینار دابنرێ. 

 

ئەو سەرچاوەیە گوتیشی: "دوای ئەوەی بڕیاری خەرجکردنی مووچەی مانگی ئاب درا، لە ماوەی یەک بۆ دوو رۆژدا داهاتی نانەوتی دەخرێتە سەر هەژماری وەزارەتی دارایی عێراق".

 

23-09-2025 ئەنجوومەنی وەزیرانی عێراق کۆبووەوە و بڕیاری دا مووچەی مانگی تەممووزی مووچەخۆرانی هەرێمی کوردستان خەرج بکات.