فڕۆکەخانەی نێودەوڵەتیی سلێمانی: لە مانگی داهاتووەوە هەفتانە 16 گەشتی چوون و هاتنمان بۆ تورکیا دەبێت

 

 

ئەمڕۆ چوارشەممە 05-11-2025 دانا محەممەد، گوتەبێژی فڕۆکەخانەی نێودەوڵەتیی سلێمانی بە تۆڕی میدیایی رووداوی گوت، "ئێستا لە هەفتەیەکدا 4 رۆژ گەشتی هێڵی ئاسمانیی تورکیش ئێیەرلاینمان هەیە؛ گەشتەکان چوون و هاتنن. لە 03-12-2025یشەوە هەفتەی چوار رۆژ هێڵی ئەی جێتمان دەبێت؛ ئەویش هاتن و چوونە."

 

تورکیا لە 3ی نیسانی 2023 ئاسمانی وڵاتەکەی بەڕووی فڕۆکەخانەی نێودەوڵەتیی سلێمانیدا داخست، ئەوەش بە پاساوی زیادبوونی چالاکییەکانی پارتی کرێکارانی کوردستان (پەکەکە) لە سنوورەکە و زیادبوونی هەژموونی ئەو پارتە لە فڕۆکەخانەکە، وەکو تورکیا ئاماژەی پێدەکرد.

 

رۆژی 9ی تشرینی یەکەمی 2025 و لەسەر داوای نێچیرڤان بارزانی، سەرۆکی هەرێمی کوردستان و بە رەزامەندی و راسپاردەی رەجەب تەیب ئەردۆغان، سەرۆککۆماری تورکیا، گەمارۆی سەر فڕۆکەخانەی سلێمانی هەڵگیرا.

 

رۆژی 03-11-2025 فڕۆکەیەکی هێڵی ئاسمانیی تورکیش ئێیەرلاینز بە 120 گەشتیارەوە لە فڕۆکەخانەی نێودەوڵەتیی سلێمانی نیشتەوە. 

 

لەبارەی گەشتی هەفتانەی فڕۆکەخانەی نێودەوڵەتیی سلێمانی بەگشتی، دانا محەممەد دەڵێت، "تازە بە رووی دنیادا کراوینەتەوە و ئەو گەشتانەی پێشتر هەمانبوون، وەک گەشتەکانی هێڵی شاهانەی ئوردنی، هێڵی ئاسمانیی عێراقی، هێڵی قەتەری و فلای دوبەیمان هەبوون و ئێستاش بەردەوامن."

 

لەبارەی خۆڕێکخستنەوەی هێڵە ئاسمانییەکانەوە، گوتەبێژی فڕۆکەخانەی نێودەوڵەتیی سلێمانی گوتی، "لە رووی لابردنی قەدەخەی هاتووچۆوە تازەین و تاوەکو کۆمپانیاکانیش خۆیان رێک دەخەنەوە و فڕۆکە دابین دەکەن، گرووپی نێو فڕۆکە ئامادە دەکەن، کاتی دەوێ."

 

سەبارەت بە رێککەوتن و گەشت بۆ رۆژهەڵات و رۆژئاوای کوردستان، دانا محەممەد گوتی، "بۆ رۆژهەڵاتی کوردستان، بەتایبەت کرماشان خەریکی گفتوگۆین. ئێمە دامەزراوەیەکی جێبەجێکارین. هەر کۆمپانیایەک رێکارە یاساییەکان تەواوبکات و بیەوێ گەشتی لە فڕۆکەخانەی نێودەوڵەتیی سلێمانی بکات، کارئاسانی بۆ دەکەین و هاوکاری دەبین."

 

فڕۆکەخانەی نێودەوڵەتیی سلێمانی لە ساڵی 2003 بەردی بناخەی دانرا و لە ساڵی 2005 بە فەرمی کرایەوە.