وەزیری دارایی: کێشە سیاسییەکانی نێوان هەولێر و بەغدا چارەسەرببن کێشەی مووچەش چارەسەر دەبێت

 

ئێوارەی رۆژی سێشەممە، 05-12-2023، وەزارەتی دارایی و ئابووری هەرێمی کوردستان لە راگەیێندراوێکدا رایگەیاند، ئاوات شێخ جەناب، وەزیری دارایی و ئابووری پێشوازی لە نەسروڵڵا رەشنوودی، کۆنسوڵی گشتیی کۆماری ئیسلامیی ئێران لە هەولێر کرد.

 

بەگوێرەی راگەیێندراوەکە، وەزیری دارایی باسی لە دوایین هەنگاوەکان و گفتوگۆکانی نێوان هەرێمی کوردستان و عێراقی لەسەر پرسی بودجە و مووچە بۆ کۆنسوڵی ئێران کردووە و رایگەیاندووە، "هەوڵەکان بەردەوامن بە ئاڕاستەی هەموارکردنەوەی یاسای بودجەی عێراق بەو هیوایەی بتوانین بۆ ساڵی داهاتوو پرسی مووچەی فەرمانبەران لە هەموو کێشە و ململانێیەک دوور بخەینەوە."

 

ئاوات شێخ جەناب ئاماژەی بەوەکردووە، هەوڵ دەدەن بە یەک شێواز مامەڵە لەگەڵ مووچەخۆرانی هەرێمی کوردستان و پارێزگاکانی دیکەی عێراق بکرێت؛ داواشی لە کۆنسوڵی ئێران کردووە، لە رێگەی پەیوەندییەکانیانەوە هاوکار بن بۆ چارەسەری کێشەکانی نێوان هەولێر و بەغدا.

 

بەگوێرەی راگەیێندراوەکەی وەزارەتی دارایی، نەسروڵڵا رەشنوودی رایگەیاندووە، توانا و پەیوەندییەکانی خۆیان بۆ چارەسەرکردنی کێشەکانی هەولێر و بەغدا لەسەر پرسی بودجە و مووچە دەخەنەگەڕ.

 

لە بەشێکی دیکەی کۆبوونەوەکەدا، کۆنسوڵی ئێران لە هەولێر باسی لە شایستەی ئەو کۆمپانیا ئێرانیانە کردووە کە لە هەرێمی کوردستان کاردەکەن و بەهۆی کێشەی داراییەوە شایستەکانیان دواکەوتووە، لەو بارەیەوە ئاوات شێخ جەناب رایگەیاندووە، "ئەنجومەنی وەزیران و وەزارەتە پەیوەندیدارەکان پابەندن بە خەرجکردنی شایستەی کۆمپانیاکان..بە چارەسەربوونی کێشە سیاسییەکانی نێوان هەرێمی کوردستان و حکومەتی ناوەندی، کە کێشەی گەورەی ئابووری و دارایی قورسی بۆ هەرێمی کوردستان دروستکردووە، کێشەی سەرجەم کۆمپانیا ئێرانییەکان، بیانی و نێوخۆییەکانیش چارەسەر دەبن، بەتایبەت کێشەی مووچەی فەرمانبەران و مووچەخۆرانی هەرێمی کوردستان."

 

کۆبوونەوەکە لەکاتێکدایە، تاوەکو ئەمڕۆ لە هەرێمی کوردستان مووچەی مانگی ئەیلوول دابەش نەکراوە، حکومەتی هەرێمی کوردستان رایگەیاندووە، ئەوان چاوەڕوانن بەغدا پارە بنێرێت و راستەخۆ دەستبکەن بە دابەشکردنی مووچەی مانگی نۆ.