فرۆشتنی مریشکی بێ ستیکەر لە هەولێر قەدەخە کرا؛ 'مریشکی تورکی و ئێرانی بە ناوی تازە دەفرۆشرێن'

 

 

رۆژی دووشەممە 6ی نیسانی 2026، سەید هێمن سەید موراد، بەڕێوەبەری گشتیی کشتوکاڵی هەولێر بە تۆڕی میدیایی رووداوی راگەیاند، "دۆخێکی نەخوازراو و فێڵکردن لە بازاڕەکاندا دروستبووە. هەندێک کەس بە نایاسایی مریشکی بەستووی تورکیا و ئێران دەهێنن، لە زەرفەکەی دەری دەهێنن و دەیخەنە نێو قاپێکی سەفەری و بە نایلۆنێکی شەفاف دایدەپۆشن، دواتر لە مارکێتەکان بەناوی مریشکی تازەی نێوخۆ و تازە سەربڕاو بە هاووڵاتییانی دەفرۆشن."

 

بە گوتەی بەڕێوەبەری گشتیی کشتوکاڵی هەولێر، ئەم کارە ناوبانگی پڕۆژە نێوخۆییەکان خراپ دەکات، "چەندین پڕۆژەی سامانی ئاژەڵ و سەربڕخانە لای ئێمە سکاڵایان تۆمار کردووە، کە بە ناوی ئەوانەوە لە چەندین مارکێت ئەو فێڵە کراوە و مریشکی بەستوو بەناوی بەرهەمی ئەوانەوە فرۆشراوە."

 

لەبارەی رێکارەکان بۆ رێگریکردن لەو فێڵە، هێمن سەید موراد دەڵێ، "بڕیارمان دا فرۆشتنی هەموو جۆرە مریشکێکی ئامادەکراو کە بێ ستیکەر بێت و رێککەوتی بەرهەمهێنان و شێوازی فرۆشتنی دیار نەبێت، قەدەخە بکەین. ئەم جۆرە مریشکە زیانی زۆرە، چونکە هاووڵاتی نازانێت کەی ئامادەکراوە و ماوەی بەسەرچووە یان نا."

 

بەڕێوەبەری گشتیی کشتوکاڵی هەولێر هۆشداری دا و رایگەیاند، "هەر کەسێک سەرپێچی ئەم بڕیارە بکات، رووبەڕووی سزای یاسایی دەبێتەوە. بۆ رێکخستنی زیاتری ئەم بابەتە و گرتنەبەری رێکاری تووندتر، ئەمڕۆ لەگەڵ لایەنە پەیوەندیدارەکان کۆدەبینەوە."

 

لە هەرێمی کوردستان، خواستی زۆر لەسەر مریشکی زیندووە بەراورد بە بەستوو. بۆ دابینکردنی مریشکیش هەزار و 840 پەلەوەرخانە هەن. وەزارەتی کشتوکاڵی هەرێمی کوردستان ئاماژە بەوە دەکات، "بەرهەمی هەرێمی کوردستان دەتوانێ بازاڕەکانی خواروو و نێوەڕاستی عێراقیش پڕبکاتەوە."

 

بەپێی ئامارەکانی وەزارەتی کشتوکاڵی هەرێمی کوردستان، ساڵانە زیاتر لە 105 ملیۆن مریشک لە هەرێمی کوردستان بەخێودەکرێن، کە بەرهەمەکەیان نزیکەی 250 هەزار تۆن گۆشتە.

 

 

- سلێمانی: 727 پەلەوەرخانە

- هەولێر: 576 پەلەوەرخانە

- دهۆک: 344 پەلەوەرخانە

- هەڵەبجە: 35 پەلەوەرخانە