دکتۆر مازن جەمیلە ئازادکرا

 

 

 

مازن هەیاس عەباس، کە بە مازن جەمیلە ناسراوە و قوتابی قۆناخی پێنجی کۆلێژی پزیکشی زانکۆی سلێمانییە. دوو هەفتە بەر لە ئێستا خواردنگەیەکی بە ناوی 'کیتۆ' لە شاری هەولێر کردەوە و لە تۆڕە کۆمەڵایەتییەکانیش زانیاریی لەبارەی کیتۆدایت بڵاودەکردەوە. چەند رۆژێک لەمەوبەر لەلایەن ئاسایشەوە دەستگیرکرا، بەڵام پارێزەرەکەی دەڵێ: "هیچ تۆمەتێکی بەسەردا ساخ نەبووەتەوە".

 

ئەیاد کاکەیی، پارێزەری مازن هەیاس بە رووداوی راگەیاند، مازن چووەتە بەردەم دادوەر، بەڵام هیچ تۆمەتێکی بەسەردا ساخ نەبووەتەوە و بڕیاری ئازادکردنی دەرچووە و ئەمڕۆ ئازاد دەکرێت.

 

لەبارەی تۆمەتەکانی سەر مازنیش گوتی: "چەند تۆمەتێکی خرابووە پاڵ، لەوانە هەڵگرتنی چەکی بێمۆڵەت و ئەندامبوون لە پەکەکە، بەڵام لە لێکۆڵینەوەکاندا تۆمەتەکانی بەسەردا ساخنەبوونەوە و نەتوانرا ماددەیەکی یاسایی بۆ دروستبکرێت بۆ دادگایی".

 

پێشتر جەمیلە مەهدی کاکەیی، دایکی مازن لە گرتەیەکی ڤیدیۆییدا کە بۆ رووداوی ناردبوو گوتی: " نازانم کوڕەکەم لەسەرچی دەستگیرکراوە، بەڵام دوای دەستگیرکردنی یەکجار قسەم لەگەڵیدا کردووە و پێیگوتووم: لەسەر هەڵگرتنی چەکی بێ مۆڵەت دەستگیرکراوم".

 

دایکی مازن سەبارەت بە هۆکاری دەستگیرکردنی کوڕەکەی گوتی: "لەبەرئەوەی لە دەرەوەی شار باخچەیەکمان هەیە، دەمانچەیەکی کڕیوە و مۆڵەتی هەڵگرتنیشی لای یەکێتی نیشتمانی کوردستان وەرگرتووە، مەزن پێیگوتووم: دەستگیرکردنەکەم لێکتێنەگەیشتنە".