فەرماندەی ئاسایشی پارێزگای حەسەکە بۆ رووداو: دەسەڵاتی دەوڵەت دەگەڕێتەوە دەروازەی سێمالکا
رووداو دیجیتاڵ
فەرماندەی ئاسایشی پارێزگای حەسەکە دەڵێ، دەسەڵاتی دەوڵەت دەگەڕێتەوە دەروازەی سێمالکا و ئاماژە بەوەش دەکات، پرسی دەروازەکە سیاسییە.
مەروان عەلی، فەرماندەی ئاسایشی پارێزگای حەسەکە، رۆژی شەممە 07-02-2026، سەردانی نوورەدین عیسا، پارێزگاری حەسەکەی کرد و دواتر لە کۆنفرانسێکی رۆژنامەڤانیدا وەڵامی پرسیاری رۆژنامەڤانانی دایەوە کە پەیامنێری تۆڕی میدیایی رووداویش ئامادە بوو.
سەبارەت بە نێوەڕۆکی کۆبوونەوەکەیان لەگەڵ پارێزگار، مەروان عەلی رایگەیاند، دۆخەکە زۆر ئەرێنی بوو و باسیان لە پرسەکانی ئاگربەست، خاڵی ئەمنی و سەردانی شاندێکی وەزارەتی بەرگری بۆ کۆبوونەوە لەگەڵ هێزەکانی سووریای دیموکرات کردووە.
مەروان عەلی رایگەیاند، "رێککەوتین لەسەر هەنگاوەکانی داهاتوو. پشتیوان بە خودا، دەست بە هەنگاوەکان دەکەین لە وەرگرتنی فڕۆکەخانەی قامشلۆ و کێڵگەی نەوتی رومێلان و کشانەوەی هێزەکان بۆ شوێنی خۆیان لەلایەن هەردوولاوە، بۆ نەهێشتنی گرژییەکان."
سەبارەت بە نوورەدین عیسا، فەرماندەی ئاسایشی پارێزگای حەسەکە گوتی، "نوورەدین عیسا پارێزگاری حەسەکەیە و لەلایەن بەڕێز ئەحمەد شەرع، سەرۆکی سووریاوە راسپێردراوە."