‏65 هەزار دۆنم زەویی چێندراو بە گەنم ژێرئاو كەوتووە

 

 

پشتیوان حەمەعەلی، بەڕێوەبەری بەرهەمهێنان ‌و پەسندكردنی تۆو لە ‏بەڕێوەبەرایەتیی كشتوكاڵی سلێمانی، ئەمڕۆ سێشەممە 07-04-2026  بە تۆڕی میدیایی رووداوی راگەیاند، ‏ساڵانە ژمارەیەکی زۆر جووتیار بە ئومێدی ئەوەی بەرهەمێكی باشیان هەبێت، نزیك لە دەریاچە و رووبەرە ئاوییەکانی دیکە گەنم دەچێنن.

 

ئەو بەرپرسە گوتی، هەندێ ساڵ كە ‏باران كەم دەبێت، ئەو جووتیارانە بەرهەمی باشیان دەبێت و ئەو ساڵانەش كە باران زۆر ‏دەبێت، گەنمەكەیان ژێرئاو دەكەوێت.

 

پشتیوان حەمەعەلی گوتی، "ئەم ساڵ كە باران زۆر باریوە، لە سنوورەكانی پشدەر، دووكان، شارەزوور، هەڵەبجە‌ و ‏دەربەندیخان نزیكەی 65 هەزار دۆنم زەوی چێنراو بەگەنم ژیرئاو كەوتووە. بەشی زۆری ئەو رووبەرە لە سنووری دەروازەی ‏راپەڕینە."

 

بەڕێوەبەری بەرهەمهێنان ‌و پەسندكردنی تۆو لە بەڕێوەبەرایەتی ‏كشتوكاڵی سلێمانی ئەوەشی خستەڕوو، پێشتر هەموو ئەو كەسانەی ‏زەویان نزیك دەریاچەكان هەبووە قەرەبوو كراونەتەوە، بەڵام ساڵانە ‏هەر دەیچێن.