راوێژكارێكی وەزارەتی ناوخۆی هەرێمی كوردستان دەڵێ، هەولێر و بەغدا لەسەر سیستمی ئەسیكۆدا ‏رێككەوتن ‌و "بەپێی رێككەوتنەكەش هەموو یاسا‌ و ‏تایبەتمەندییەكانی هەرێمی كوردستان رەچاو دەکرێن."

بەڕێوەبەرێكی گشتیی وەزارەتی خوێندنی باڵا دەڵێت، ئەنجوومەنی وەزارەتەكەی بۆ بڕیاردان لەسەر ئاراستەی خوێندنی ئەم ساڵ کۆدەبێتەوە، ئەوەش دوای ئەوەی بەرەبەیانی ئەمڕۆ دۆناڵد ترەمپ ئاگربەستێکی دوو هەفتەیی راگەیاند

بەرپرسێكی وەزارەتی كشتوكاڵ دەڵێ، لە سنووری هەردوو ‏پارێزگای سلێمانی ‌و هەڵەبجە نزیكەی 65 هەزار دۆنم زەویی چێندراو بە گەنم ‏ژێرئاو كەوتووە. ئاماژە بەوەش دەکات، "ئەو زەویانە لە نزیك دەریاچە و رووبەرە ئاوییەکانە ‌و پێشتر ‏خاوەنەكانیان قەرەبوو كراونەتەوە."‏

ئەو شاندەی بۆ پرسی مووچە ‌و سیستمی ئەسیكۆدا سەردانی بەغدای ‏كردبوو گەڕایەوە هەرێمی كوردستان ‌و بڕیارە سبەی شاندێكی دیكە ‏بچێتەوە بەغدا ‌و بۆ هەمان پرس درێژە بە ‏كۆبوونەوەكان بدەن. ئەندامێكی شاندەكە دەڵێ، "هیچ رێككەوتنێكی ‏یەكلاییكەرەوە لەگەڵ بەغدا نەكراوە، بەڵام لێكتێگەیشتنی باش لەبارەی پرسەکان هەیە."

بەڕێوەبەری گشتیی بازرگانی و پیشەسازیی هەرێمی كوردستان دەڵێ، ‏ئەوەی لە بازاڕدا گران بووە زیاتر برنج ‌و رۆنی شلە، ئەوەش ‏بە دابەشكردنی بەشی دووەمی بەشەخۆراكی مانگانە نرخەكەی ‏دادەبەزێتەوە. ئاماژە بەوەش دەکات، بەهۆی گرانفرۆشی ‌و سەرپێچیی جۆراوجۆرەوە ‏25 شوێنیان داخستووە.

لەپێناو بەرزبوونەوەی ئاستی ئاوی ژێرزەوی، بەڕێوەبەرایەتیی گشتیی ‏سەرچاوەكانی ئاوی هەرێمی كوردستان 8 پڕۆژەی بۆ ‏پاراوكردنی ئاوی ژێرزەوی دروستكردووە و ئەم ساڵ بۆ یەكەمینجار ‏سوودیان لێ بینراوە.‏

بەرپرسانی كۆمەڵەی میوانخانە ‌و چێشتخانەكانی كوردستان لە سلێمانی ‌و ‏هەولێر رەتی دەكەنەوە كە هیچ خواردنگەیەك لە ئەنجامی کەمبوونەوەی گازی ‏شل داخرابێت یان خواردنەكەی گران كردبێت.

بەڕێوەبەری گشتیی بەنداوەكانی هەرێمی كوردستان دەڵێ، كۆی ئاوی کۆگاکراوی بەنداوەكانی هەرێمی كوردستان گەیشتووەتە نزیكەی 7 ملیار ‏مەتر سێجا. ئاماژە بەوەش دەکات، لە كۆی 25 بەنداوەكە "تەنیا سێ‌ بەنداو ماون سەرڕێژ ‏بن، كە یەکێکیان پڕبوونی مسۆگەرە."

827 سزادراوی نێو چاكسازییەكانی هەرێمی ‏كوردستان وازیان لە مادە هۆشبەرەكان هێناوە، ئەوەش لە ئەنجامی بەشداریکردنیان لە چەند خولێکی شیاندنەوە.

#SUMMARY#