سبەی فەریزەی حەج کۆتایی دێت و دواتر گەڕانەوەی حاجییان دەستپێدەکات

 

رۆژی شەممە، نەبەز ئیسماعیل، گوتەبێژی وەزارەتی ئەوقاف و کاروباری ئایینیی هەرێمی کوردستان بە تۆڕی میدیایی رووداوی گوت: "سوپاس بۆ خودا، هەموو شتێک باشە و ئەم ساڵ هیچ حاجییەکی هەرێمی کوردستان لە سعودیە گیانی لەدەستنەداوە".

 

شەوی رابردوو حاجییان لە مینا مانەوە. نەبەز ئیسماعیل کە هاوکات سەرۆکی لیژنەی رێوڕەسمەکانی حەجی ئەم ساڵە گوتی: "حاجییان ئەمشەویش لە مینا دەمێننەوە و سبەی کاژێر 14:00 بۆ دوایین جار ئەهریمەن بەردباران دەکەن و کۆتایی بە رێوڕەسمەکان دێت".

 

گوتەبێژی وەزارەتی ئەوقافی هەرێمی کوردستان لە سعودیەوە بۆ رووداو قسەی کرد و ئاماژەی بەوەشکرد: "تەنیا رێکارێک مابێت ئەوەیە کاتێک حاجییان دەگەڕێنەوە، بە چەند کاژێرێک پێش گەڕانەوە دەچن تەوافی ماڵئاوایی دەکەن".

 

ئەم ساڵ ئەوانەی بە رێگەی وشکانی بۆ رێوڕەسمەکانی حەج چوونە سعودیە، هەزار و 646 هاونیشتمانی و ئەوانەشی لە رێگەی ئاسمانییەوە چوون ژمارەیان سێ هەزار و 490 کەسە.

لەبارەی کاتی گەڕانەوەی حاجییانی هەرێمی کوردستان، نەبەز ئیسماعیل گوتی: "دەسەڵاتی گەڕانەوە لای عێراقە، بەڵام بەگوێرەی زانیاری ئێمە، گەڕانەوەی گەشتی ئاسمانی نێوەڕاستی ئەم مانگە دەستپێدەکات و گەشتی وشکانیش کەمێک لەو وادەیە زووتر دەبێت".

 

16ـی ئایار، یەکەم کاروانی زیارەتکارانی رێوڕەسمەکانی حەج لە هەرێمی کوردستانەوە لە رێگەی وشکانییەوە بەرەو سعودیە بەڕێکەوتن و یەکەم گەشتی ئاسمانییش 19ـی هەمان مانگ بەرەو ئەو وڵاتە بەڕێکەوت.