لە لوڕستان بە هەوڵی خێرخوازان 25 بەندکراو ئازادکران

 

ئێوارەی دوێنێ پێنجشەممە، 06-11-2025، تەوەکوول شاکەرەمی، بەڕێوەبەری گشتیی دەستەی خوێنبایی پارێزگای لوڕستانی رۆژهەڵاتی کوردستان رایگەیاند، 25 بەندکراو کە سزاکەیان بەهۆی ''تاوانی بەئەنقەست''ـەوە نەبووە، لە زیندانەکانی پارێزگاکە ئازاد کراون.

 

بەگوتەی تەوەکوول شاکەرەمی ئازادکردنی بەندکراوەکان بە هاوکاریی خێرخوازان بووە، ئەمەش دوای دابینکردنی دوو ملیار تمەن (نزیکەی 20 هەزار دۆلار) وەکو خوێنبایی بەندکراوەکان.

 

کۆکردنەوەی پارە بۆ ئازادکردنی ئەو 25 بەندکراوە، بەبۆنەی ساڵوەگەڕی کۆچی دوایی فاتیمەی کچی پێغەمبەری ئیسلام (د.خ) بووە. بەڕێوەبەری گشتیی دەستەی خوێنبایی لوڕستان ئاشکرای کرد، لە 21-03-2025ـوە تاوەکو 21-10-2025 واتا لە حەوت مانگدا، بە کۆکردنەوەی 407 ملیار تمەن لەلایەن خێرخوازانەوە، نزیکەی 209 بەندکراو، کە سزاکانیان بەهۆی ''تاوانی بەئەنقەست'' نەبووە، لە زیندانەکانی پارێزگاکە هێنراونەتە دەرەوە.

 

ئەو شێوە ئازادکردنە، زیندانییانی سیاسی ناگرێتەوە و تەنیا ئەو کەسانە دەتوانن لێی سوودمەند بن، کە بەهۆی ''تاوانەکان''ـیانەوە سکاڵایان لەسەر تۆمارکراوە و پێبژاردن، خوێنبایی، قەرزی حکومی یان ناحکومییان لەسەرە.