ئیدارەی سەربەخۆی راپەڕین داوا لە مامۆستایانی سنوورەکەی دەکات بگەڕێنەوە ناوەندەکانی خوێندن

 

 

ئەمشەوی دووشەممە، ئیدارەی سەربەخۆی راپەڕین لە راگەیێندراوێکدا دەڵێت، "وێڕای هەستکردن بە بەرپرسیاریەتی بەرامبەر خوێندکارانی سنووری پەروەردەی راپەڕین و پشتیوانی و هاوڕابوون لەگەڵ داوا رەواکانی وانەبێژان و مامۆستایانی بەڕێز، بە پێویستی دەزانین داوا لە سەرجەم مامۆستایان و خوێندکارانی سنورەکەمان بکەین کە لە سبەینێوە بگەڕێنەوە ناوەندەکانی خوێندن، وەک چۆن وەک هەمیشە پاڵپشتی تەواو لە وانەبێژان و مامۆستایانی بەڕێز دەکەین لە داواکردنی داوا رەواکانیان و بە هەموو شێوەیەک پشتیوانیانین".

 

هەروەها دەشڵێت، "ئێمە لە ئیدارەی سەربەخۆی راپەڕین هەمیشە داواکاریی کەسوکاری خوێندکارانمان بۆ دێت بۆ دەستپێکردنەوەی دەوامی خوێندنگەکان و دەستپێکردنی ساڵی نوێی خوێندن، بۆیە داوا لە کەسوکاری خوێندکارانیش دەکەین پاڵپشت و پشتیوانی مامۆستایان بن لە دەستپێکردنەوەی دەوام و گەشانەوەی چرای رووناکی خوێندنگەکان".

 

لە 13-9-2023، ساڵی خوێندنی 2023-2024 لە هەرێمی کوردستان دەستیپێکرد، بەڵام لە پارێزگاکانی سلێمانی و هەڵەبجە بەهۆی بایکۆتەوە دەوام دەستیپێنەکردووە.

 

چاوەڕێ دەکرێت سبەی سێشەممە، 9ـی کانوونی دووەمی 2024 دەوامی ئەو پارێزگایانە دەستپێبکاتەوە، بەڵام مامۆستایانی ناڕازی دەڵێن، تا جێبەجێکردنی داواکارییەکانیان ناچنەوە ناوەندەکانی خوێندن.

 

رۆژی یەکشەممە، 07-01-2024، وەزارەتی پەروەردەی هەرێمی کوردستان نووسراوێکی بڵاوکردەوە و رایگەیاند، پاش هەموارکردنەوەی یاسای بودجەی گشتیی عێراق و ناردنی پارە بۆ هەرێمی کوردستان، داواکاریی مامۆستایان جێبەجێ دەکەن، کە ئەوانیش پلەبەرزکردنەوە و بە گرێبەستکردنی وانەبێژانە.