هاتنی سەرما نرخی قازی لە هەرێمی کوردستان بەرز کردووەتەوە

 

 

محەممەد ئەحمەد، فرۆشیاری قاز و مریشکە لە شاری هەولێر و ئەمڕۆ پێنجشەممە بە تۆڕی میدیایی رووداوی گوت، "قاز بەگوێرەی کێشەکەی نرخی دیاری دەکرێت و لە 12 هەزار دینارەوە دەستپێدەکات تاوەکو 15 هەزار دینار."

 

بە گوتەی ئەو کاسبکارە، قازێک کێشەکەی تاوەکو سێ کیلۆ بێت، کیلۆی بە 12 هەزار دینارە و لە سێ کیلۆ تاوەکو 5 کیلۆ بە 14 هەزارە و لەو کێشە بەسەرەوە کیلۆی دەبێتە 15 هەزار دینار.

 

لە مانگی رابردوودا هەمان فرۆشیاری قاز کیلۆیەکی بە 10 بۆ 11 هەزار دینار فرۆشتووە. ئەو دەڵێت، "هۆکاری بەرزبوونەوەی نرخەکە، بەهۆی خواستی زۆرە بەهۆی هاتنی سەرماوە."

 

محەممەد ئەحمەد ئاماژەی بەوەش کرد، "نرخی مریشک کەمێك بەرزبووەتەوە، ئەمڕۆ کیلۆی بە 3 هەزار و 250 دینارە، لە کاتێکدا هەفتەی رابردوو 2 هەزار و 900 دینار بوو."