کەسێک لە کەرکووک بەهۆی خواردنەوەی کحوول گیانی لەدەستدا؛ 'ویستوویەتی 10 لیتر بخواتەوە'

رووداوەکە شەوی چوارشەممە 07-05-2025 لە گەڕەکێکی کەرکووک روویداوە. هیوا حوسامەدین، پەیامنێری رووداو بەدواداچوونی بۆ بابەتەکە کردووە و بۆی دەرکەوتووە کە هاووڵاتییەکە کریستیانە و خەڵکی گەڕەکی تەپەیە لە کەرکووک. بە تەنیا دەژی و کەسوکارەکەی لە دەرەوەی وڵاتن.

 

بەگوێرەی زانیارییەکانی پەیامنێری رووداو، ''ئەو هاووڵاتییە رۆژانە کحولی خواردووەتەوە و شەوی رابردوو ویستوویەتی هەشت بۆ 10 لیتر بخواتەوە.''

 

ئەو هاووڵاتییە لەدوای کڕینی 10 لیتر خواردنەوەی کحوولی، هەر لەوێ لە تەنیشت دیوارێک چەند لیترێکی خواردووەتەوە، بەڵام تەندروستی تێکچووە و لەلایەن خەڵکەوە گەیێندراوەتە نەخۆشخانەی کۆماریی کەرکووک.

 

هیوا حوسامەدین ئاماژەی دا، ''تەنیا سێ خولەک لە بەشی فریاکەوتنی نەخۆشخانەکە ماوەتەوە و دواتر گیانی لەدەستداوە.''

 

پۆلیس رووداوەکەی بڵاوکردووەتەوە و رایگەیاندووە، ژمارەیەک لە کرستیانەکان تەرمی ئەو هاووڵاتییەیان لە دادپزیشکیی کەرکووک وەرگرتووەتەوە و بەیانیی ئەمڕۆ پێنجشەممە بەخاکسپێردراوە.