لە دوو رووداوی هاتووچۆدا لە سنە 16 کەس بریندار بوون

 

 

ئەمڕۆ سێشەممە 8ی تەممووزی 2025 بابەک هودائی، بەڕێوەبەری بەشی فریاکەوتنی نەخۆشخانەکانی پارێزگای سنە لە رۆژهەڵاتی کوردستان رایگەیاند، "کاژێر 03:00ی پاشنیوەڕۆ لە رێگەی سەرەکیی دیواندەرە دوو رووداوی هاتووچۆ روویاندا، لە ئەنجامدا 16 کەس بریندار بوون."

 

هودائی گوتی، "رووداوی یەکەم لە رێگەی نسارە – دیواندەرە لەنێوان دوو ئۆتۆمبێلی تایبەت روویدا و لە ئەنجامدا 11 کەس بریندار بوون."

 

بە گوتەی بەڕێوەبەری بەشی فریاکەوتنی نەخۆشخانەکانی سنە، "رووداوی دووەم لە رێگەی سەقز – دیواندەرە لەنێوان دوو ئۆتۆمبێلی جۆری پراید و پیژۆ روویدا، لە ئەنجامدا 5 کەس بریندار بوون."

 

ساڵانە ژمارەیەکی زۆر هاووڵاتی لە ئەنجامی رووداوەکانی هاتووچۆ لە رۆژهەڵاتی کوردستان و ئێران گیان لەدەستدەدەن.

 

بەگوێرەی دادپزیشکیی ئێران، لە 21-03-2024 تاوەکو 21-03-2025، لانیکەم 20 هەزار و 45 کەس لە رۆژهەڵاتی کوردستان و ئێران بە رووداوی هاتووچۆ گیانیان لەدەستداوە.