ئەم ساڵ 500 هێکتار لەوەڕگە لە بۆکان سووتاون
رووداو دیجیتاڵ
سەرۆکی بەڕێوەبەرایەتیی سەرچاوە سرووشتییەکانی بۆکان رایگەیاند، ئەم ساڵ 500 هێکتار لەوەڕگە لەو شارە سووتاون و بە گشتی 5 ملیار تمەن زیانی مادی هەبووە.
ئیسماعیل عەبدوڵڵاوەند، سەرۆکی بەڕێوەبەرایەتیی سەرچاوە سرووشتییەکانی بۆکان دەڵێت، "زۆربەی ئاگرکەوتنەوەکان بەهۆی گوێنەدانی جووتیاران، شوانەکان و رێبواران بووە و زۆرجار بەهۆی شاخاوی و سەختیی شوێنەکان، ئۆتۆمبێلی ئاگرکوژێنەوە نەگەیشتووەتە شوێنەکە."
هەروەها سەرۆکی بەڕێوەبەرایەتیی سەرچاوە سرووشتییەکانی بۆکان رۆڵی خەڵکی ناوچەکە و ژینگەپارێزانی لە کوژاندنەوەی ئاگرەکان بەرز نرخاند.
ئەو بەرپرسە داوا لە خەڵک و ژینگەپارێزانیش دەکات، لەکاتی بینینی تێکدانی سەرچاوە سرووشتییەکان و قاچاخی داری دارستانەکان، بەرپرسانی سەرچاوە سرووشتییەکانی شارەکەی لێ ئاگادار بکەنەوە.