فریاکەوتنی سلێمانی بۆ رووداو: 5 کرێکار بەهۆی رووخانی باڵەخانەیەک بریندار بوون

 

 

سەرۆکی لقی سلێمانی سەندیکای کرێکارانی کوردستان دەڵێت، لەکاتی رووخانەکەدا چەند کرێکارێک لەژێر باڵەخانەکەدا بوون. بەڕێوەبەری فریاکەوتنی خێرای سلێمانیش دەڵێت، پێنج کەس بریندارن و گیانلەدەستدان تۆمار نەکراوە.

 

دوای نیوەڕۆی ئەمڕۆ 08-11-2023، چالاک رەئوف، سەرۆکی لقی سلێمانی سەندیکای کرێکارانی کوردستان بە تۆڕی میدیایی رووداوی گوت، "بەرامبەر شاری مامۆستایان لە شاری سلێمانی باڵەخانەیەک لەکاتی تێکردنی سەقفێکیدا رووخا و بەهۆیەوە چەند کرێکارێک برینداربوون".

 

هاوکات سامان نادر، بەڕێوەبەری فریاکەوتنی تەندروستیی سلێمانی بە تۆڕی میدیایی رووداوی گوت، بەهۆی رووداوەکەوە پێنج کەس برینداربوون و گوێزراونەتەوە بۆ نەخۆشخانە و هیچ گیانلەدەستدانێک تۆمار نەکراوە.

 

سامان نادر گوتیشی، تەندروستی هەر پێنج بریندارەکە باشە و لەژێر چاودێری پزیشکدان.

 

بەگوێرەی ئاماری سەندیکای کرێکارانی کوردستان بۆ رووداو، تاوەکو کۆتایی مانگی ئابی ئەمساڵ، 30 کرێکار لە هەرێمی کوردستان گیانیان لەدەستداوە و 24 کرێکاریش برینداربوون.

 

بەگوێرەی ئامارەکە، زۆرترین گیانلەداستدانی کرێکاران لە سلێمانی تۆمار کراوە کە 13 کرێکار بووە؛ دوای سلێمانی لە ئیدارەی گەرمیان 8 کرێكار گیانیان لەدەستداوە. لە هەولێر 7 کرێکار، دهۆک 1 کرێکار و لە زاخۆش کرێکارێک گیانیان لەدەستداوە.