ئیدریس مینبەری: سەردەمی ترساندنی چالاکڤانانی کورد لە گرتووخانە بەسەرچووە

 

ئەمڕۆ شەممە لە بەردەم ماڵی ئیدریس مینبەری رێوڕەسمێک بۆ بەڕێکردنی ئەو مامۆستایەی زمانی کوردی بۆ گرتووخانە بەڕێوەچوو و ژمارەیەک کەسایەتی و چالاکڤانی شاری سنە تێیدا بەشداربوون.

 

لە رێوڕەسمەکەدا ئیدریس مینبەری قسەی کرد و گوتی، شکستیان بەو سیاسەت و پلانەی دەسەڵاتداران هێناوە، کە دەیانەوێ گرتووخانە بۆ ترساندنی چالاکڤانان بەکاربهێنن.

 

مینبەری دەڵێت، سزادانی ئەو لە بەرامبەر ئەو تێچووانەی کورد لە پێناو سەرکەوتن داویەتی، هیچ نییە و "لە شەهیدانەوە فێربووین بەهای ئازادی بدەین".

 

بە گوتەی ئیدریس مینبەری، تاوەکو خەڵکی کوردستان مافی سەروەری نەبێت، ئازارە مێژووییەکانی خەڵک بەردەوام دەبن و تێکۆشانیش بۆ هێنانەدی ئەو مافە بەردەوام دەبێت.

 

ئیدریس منبەری، مامۆستای خۆبەخشی زمانی کوردی و ئەندامی دەستەی بەڕێوەبەریی رێکخراوی نۆژین رۆژی سێشەممە 05-11-2025 لەلایەن لقی جێبەجێکردنی سزاکانی دادگەی سنەوە ئاگادارکرابووەوە، رۆژی شەممە بۆ تێپەڕاندنی ماوەی سزاکەی خۆی بە دادگە بناسێنێت. 

 

ئیدریس مینبەری رۆژی یەکشەممە 18-12-2022 لەلایەن هێزە ئەمنییەکانەوە لە سنە دەستبەسەر کرا و دوای ماوەیەک بە کەفالەت ئازاد کرا. ئەو لە 09-10-2023 لە دادگەی تاوانی سنە بە تۆمەتی تێکدانی ئاسایشی گشتی و پێکهێنانی دەستە و گرووپ دژ بە دەسەڵات سزای ساڵێک بەندکردن و دوورخستنەوەی بۆ گرتووخانەی دزڵئاوای کرماشان سزا درا.

 

رێکخراوی کولتووری- کۆمەڵایەتیی نۆژین ساڵی 2010 دامەزراوە و لە شار و گوندەکانی پارێزگای سنە کۆرسی فێرکردنی زمانی کوردی دەکاتەوە. ئیدریس مینبەری لە دامەزرێنەرانی رێکخراوی  نۆژین و لە ئەندامانی دەستەی بەڕێوەبەری و مامۆستایانی زمانی کوردی ئەو ئەنجوومەنەیە و چالاکڤانێکی دیاری شاری سنەیە.