دوو منداڵی ئامۆزا لە رووباری دیالە خنکان و تەرمەکانیان نەدۆزراوەتەوە

 

 

عەمید هەیسەم شەمەری، گوتەبێژی پۆلیسی دیالە، ئەمڕۆ هەینی، 9ـی کانوونی دووەمی 2026، بە تۆڕی میدیایی رووداوی گوت، "کاژێر 04:00ـی ئێوارەی دوێنێ پێنجشەممە، ئاگادارکراینەوە کە لە گوندی مەرجانەی سەر بە ناحیەی سەعدییە رووداوێکی خنکان هەبووە."

 

گوتەبێژی پۆلیسی دیالە گوتی، "دوای گەیشتنی تیمەکانمان، دەرکەوت هەردوو منداڵ بە ناوەکانی ئیلیاس یاسین و ئادەم حاتەم، کە هەردووکیان لەدایکبووی ساڵی 2021 و ئامۆزای یەکدین، لە کاتی یاریکردن لە نزیک رووباری دیالە کەوتوونەتە نێو ئاوەکە و خنکاون."

 

بە گوتەی عەمید هەیسەم شەمەری، کەسوکاری منداڵەکان سکاڵایان لەسەر هیچ کەسێک نییە و رووداوەکەیان بە "قەزا و قەدەر" داناوە.

 

تیمەکانی پۆلیسی رووبارەکان، پۆلیسی سەعدییە، فریاکەوتن و خەڵکی ناوچەکە لە گەڕان بەدوای تەرمی هەردوو منداڵەکە بەردەوامن.