ئەو 7 گەنجە کوردەی لە لیبیا دەستگیر کرابوون، دەگەڕێنەوە

 

 

د. موسەننا ئەمین، ئەندامی لیژنەی پەیوەندییەکانی دەرەوە لە پەرلەمانی عێراق، ئەمڕۆ چوارشەممە 9ی تەممووزی 2025 بە تۆڕی میدیایی رووداوی راگەیاند، "کاژێر 03:05 خولەکی بەرەبەیانی سبەی پێنجشەممە 7 گەنجە کوردەکەی لیبیا دەگەنەوە فڕۆکەخانەی نێودەوڵەتیی هەولێر."

 

ئەندامەکەی لیژنەی پەیوەندییەکانی دەرەوە لە پەرلەمانی عێراق روونیکردەوە، ئەمڕۆ فڕۆکەکەی ئەو 7 گەنجە کوردە لە لیبیاوە بەرەو عەممان-ی پایتەختی ئوردن بەڕێدەکەوێت.

 

د. موسەننا ئەمین باسی لەوەش کرد، ئەو گەنجانە لەسەر ئەرکی خۆیان دەگەڕێنەوە و لەلایەن کەسوکارەکانیانەوە تیکتی فڕۆکەیان بۆ کڕدراوە، بڕیاربوو یەکێکی دیکەش کە لە زیندانییەکی دیکەی لیبیا بوو، بگەڕێتەوە؛ بەڵام بەهۆی دەستنەکەوتی تیکتی فڕۆکە، گەڕانەوەی ئەو دوادەکەوێت.

 

 

ئەو 7 گەنجە هەوڵیانداوە لە رێگەی لیبیاوە بە قاچاخ بچنە ئەورووپا، لە 24ی نیسانی 2025ـەوە پەیوەندییان لەگەڵ کەسوکاریان پچڕا، دوای ئەوەی لە لیبیا لەلایەن "هێزەکانی بەرپەرچدانەوەی خێرا" دەستگیر کران.

 

 

• دیاری فەرهاد مینە (خەڵکی راپەڕین)

• دابان مەجید رەمەزان (خەڵکی راپەڕین)

• ئەحمەد عەبدولڕەحمان ئیبراهیم (خەڵکی راپەڕین)

• کەیوان عەبدوڵڵا ئەحمەد (خەڵکی راپەڕین)

• دیاری محەممەد مەحموود (خەڵکی راپەڕین)

• دانا خدر قادر (خەڵکی راپەڕین)

• بڕیار عوسمان عەلی (خەڵکی پارێزگای هەولێر)

 

کاروان مەجید، برای یەکێک لە گەنجەکان بەناوی (دابان)، بە تۆڕی میدیایی رووداوی گوت، "براکەم و هاوڕێکانی رۆژی 23ی نیسان لە رێگەی فڕۆکەخانەی نێودەوڵەتیی هەولێرەوە چوونە میسر و لەوێشەوە بۆ لیبیا، تاوەکو لەوێوە بەرەو ئەورووپا کۆچ بکەن. لە 24ی ئەو مانگەوە بێسەروشوێن بوون و تاوەکو دواتر براکەم پەیوەندیی کرد و گوتی لە لیبیا دەستگیر کراوین."