لقی سلێمانیی یەکێتیی بەڵێندەران: داوای شایستە داراییەکانمان لە وەزارەتی دارایی کرد

 

رۆژی سێشەممە، 09ـی ئەیلوولی 2025، وەزارەتی دارایی و ئابووری لە راگەیێندراوێکدا بڵاویکردەوە: "ئاوات شێخ جەناب، وەزیری دارایی و ئابووری پێشوازی لە شاندێکی یەکێتیی بەڵێندەرانی کوردستان کرد کە پێکهاتبوون لە سەرۆک و بەشێک لە ئەندامانی لقی سلێمانیی یەکێتییەکە."

 

لە کۆبوونەوەکەدا گفتوگۆ لەسەر کێشە و گرفتەکانی بەڵێندەران و شایستە داراییەکانی کۆمپانیاکان کرا. وەزارەتی دارایی دەڵێت: "بەرپرسانی یەکێتیی بەڵێندەران چەند داواکارییەکیان خستەڕوو کە خۆی لە گەڕانەوەی بارمتەی کۆمپانیاکان و خەرجکردنی شایستەکانیان دەبینییەوە."

 

وەزیری دارایی پشتیوانیی خۆی بۆ داواکارییەکانیان دووپاتکردەوە و دوای گفتوگۆ و پەیوەندیکردن لەگەڵ بانکی ناوەندیی هەرێم/سلێمانی بڕیاردرا بۆ رێکخستنی کۆبوونەوەیەک بەمەبەستی دانانی رێکار و میکانیزمی گونجاوی مانگانە بۆ خەرجکردنی بەشێک لە شایستە داراییەکانیان بەشێوەیەکی بەردەوام."

 

ژین عەبدوڵڵا، گوتەبێژی لقی سلێمانیی یەکێتیی بەڵێندەران بە تۆڕی میدیایی رووداوی رایگەیاند: "چەند رۆژێک پێش ئێستا داوامان کرد وەزیری دارایی ببینین و ئەمڕۆ لە وەزارەتی دارایی پێشوازی لێکردین و هەر لەوێ پەیوەندیی بە لایەنی پەیوەندیدارەوە کرد بۆ چارەسەرکردنی کێشەکانمان. بڕیارە لەم دوو رۆژەدا وەڵاممان بدەنەوە."

 

لەبارەی داواکارییەکانەوە، گوتەبێژی لقی سلێمانیی یەکێتیی بەڵێندەران گوتی: "چەند داواکارییەکمان هەبوو کە پەیوەندییان بە دابینکردنی پارە و شایستە داراییەکانمانەوە هەبوو."