یەکەم گیانلەدەستدان بەهۆی لافاوەوە لە سنووری چەمچەماڵ تۆمار کرا
رووداو دیجیتاڵ
لە سنووری ناحیەی شۆڕش لە قەزای چەمچەماڵ لە پارێزگای سلێمانی، بەهۆی لافاوەوە دیوارێک رووخاو کەسێک گیانی لەدەستدا، لە ناحیەی ئاغجەلەریش منداڵێک ئاو بردی و دواتر رزگار کرا.
ئارام نەجات، بەڕێوەبەری شارەوانیی چەمچەماڵ بە تۆڕی میدیایی رووداوی گوت: "بەهۆی باران و لافاوەوە دیوارێک رووخاوە و کەسێک گیانی لەدەستداوە".
سەرۆکی شارەوانی چەمچەماڵ گوتی: "بەهۆی لافاوەوە زیانێکی زۆری مادی هەیە، دەیان ماڵ زیانی زۆری مادییان بەرکەوتووە، بەڵام تاوەکو ئێستا کەس نەخنکاوە".
هێمن بەهجەت، بەڕێوەبەری ناحیەی ئاغجەلەر لە سنووری چەمچەماڵ بە تۆڕی میدیایی رووداوی گوت: "لە سنوورەکەمان منداڵێک ئاو بردبووی مەترسی گیانلەدەستدانی هەبوو و گوترا خنکاوە، بەڵام راست نییە و تیمەکانی بەرگری شارستانی فریای کەوتن و رزگاریان کرد".