ئەو کەسەی لە سەیدسادق برایەکی خۆی کوشت، دەستگیرکرا

لەبارەی چۆنێتی دەستگیرکردنی تۆمەتبارەکەوە، پۆلیس ئاماژە بەوە دەکات، "سەرەنجام بکوژ خۆی رادەستی هێزەکانی پۆلیس کرد و لەلایەن مەفرەزەکانی بەشی پۆلیسی سەیدسادقەوە پەڕاوی لێکۆڵینەوەی بۆ رێکخراوە و بە بڕیاری بەڕێز دادوەر و بەپێی مادەی 406 راگیراوە... لە لێکۆڵینەوەکاندا تۆمەتبار (ب، ع) هۆکاری تاوانەکەی گەڕاندووەتەوە بۆ کێشەی کۆمەڵایەتی".

 

هەر لەم بارەیەوە، سەرکەوت ئەحمەد، گوتەبێژی پۆلیسی سلێمانی بە رووداوی راگەیاند، دوای رووداوەکە دادوەر بڕیاری دەستگیرکردنی بۆ تۆمەتبارەکە دەرکرد، پۆلیس چوونە شوێنی رووداوەکە، تۆمەتبار زانی لە دەستی پۆلیس رزگاری نابێت، بۆیە خۆی رادەست کرد.

 

لەبارەی رووداوەکەوە، سەرلەبەیانی ئەمڕۆ چوارشەممە، ناسیح عەلی خەیات، پوورزای کوژراوەکە بە رووداوی راگەیاند، "دوای ئەوەی (ب. ع) دەیەوێت بچێت بۆ جەژنە پیرۆزە لە دایکی، بەڵام وریای برای رێگە نادات بیبینت و دەبێتە دەمەقاڵەیان. (ب. ع) دەگەڕێتەوە ماڵی خۆی و دواتر بە چەکی M4 دەگەڕێتەوە، تەقە لە براکەی دەکات و سێ فیشەکی لێدەدات."

 

ناسیح عەلی خەیات، سەبارەت بە کێشەی ماڵی پووری گوتی، کێشەکە "لەسەر خانوویەکی بچووکی وەرەسەیە،" کە 10 ساڵە ئەو کێشەیە بەردەوامە و دوای چەندجارێک هەوڵدان، نەتواندرا چارەسەر بکرێت، ئەمڕۆ وریا بەهۆیەوە کوژراوە.

 

بەپێی زانیارییەکان، بکوژ کارمەندی هێزە ئەمنییەکانە و پلەی هەیە.

 

وریا عەبدوڵڵا تەمەنی 32 ساڵە، خێزاندار نییە و راهێنەری مەلەوانی بووە؛ شەش برای هەیە.