چۆڵکردنی زڕگوێز لە سنووری سلێمانی لەلایەن کۆمەڵەکانی رۆژهەڵاتی کوردستانەوە دەستیپێکرد

 

 

لە ناوچەکانی زڕگوێز، بانە گەورە و زڕگوێزەلە لەنزیک سلێمانی، حیزبەکانی کۆمەڵەی زەحمەتکێشانی کوردستان، رێکخراوی کوردستانی حیزبی کومۆنیستی ئێران (کۆمەڵە)، کۆمەڵەی شۆڕشگێرانی کوردستانی ئێران چەندین بارەگایان هەیە و نزیکەی دوو ساڵە داوای چۆڵکردنی ئەو بارەگایانەیان لێ دەکرێت.

 

بەگوێرەی زانیارییەکانی تۆڕی میدیایی رووداو، ئەمڕۆ کۆمەڵەکان گواستنەوەی ماڵ و بارەگاکانیان لەو ناوچانەی سلێمانی دەستپێکردووە، بڕیارە بچنە کەمپی سوورداش لە قەزای دووکان لە پارێزگای سلێمانی.

 

ئەندامێکی سەرکردایەتیی یەکێک لە کۆمەڵەکان، ئەمڕۆ شەممە بە تۆڕی میدیایی رووداوی گوت، "ئاسایش، هێزی دژەتیرۆر، ناسراو بە هێزە رەشەکەی، لەنزیک بارەگاکانمان جێگیر کردووە. ئێمەش ناچار بووین گواستنەوەی بارەگا و ماڵباتەکانمان دەستپێبکەین."

 

ئەو بەرپرسە کە لە زڕگوێزەوە قسەی بۆ رووداو کرد، گوتیشی، "بەشێکی بارەگا و خانووەکان چۆڵ دەکەین، واتە ئێستا بە تەواوی ئێرە چۆڵ ناکەین، چونکە ئەو شوێنەی دیاری کراوە جێگەی هەموو کۆمەڵەکانی تێدا نابێتەوە."

 

گواستنەوەی کۆمەڵەکان لەو ناوچانەوە بۆ ناوچەیەکی دیکە، لەچوارچێوەی رێککەوتنی بەغدا – تارانە کە هەرێمی کوردستانیش تێیدا بەشدارە.

 

هەر ئەمڕۆ ئەمجەد حوسین پەناهی، ئەندامی سەرکردایەتیی کۆمەڵەی زەحمەتکێشانی کوردستان، بە تۆڕی میدیایی رووداوی گوت، "راستە گواستنەوەمان دەستپێکردووە، بەڵام گواستنەوەکەمان ئاساییە. خەباتی ئێمە لە رۆژهەڵاتی کوردستانە و لێرە لە هەرجێگەیەک بین ئاساییە و دەستبەردان لە خەبات نییە."

 

بەگوێرەی رێککەوتنی بەغدا و تاران، دەبێت ئەو بارەگایانە و ماڵباتی پێشمەرگەکان لە سنووری سلێمانییەوە بگوازرێنەوە کەمپی سوورداش لە سنووری قەزای دووکان هەر لە پارێزگای سلێمانی.

 

ئەمجەد حوسێن پەناهی گوتی، ئەوان لەوە نیگەرانن کە ئەو شوێنەی بۆیان دیاریکراوە ئامادە و شیاو نییە بۆ ماڵباتەکانیان.

 

پێشتر و لە چوارچێوەی هەمان رێککەوتندا، حیزبەکانی کۆمەڵە و حیزبی دیموکراتی کوردستانی ئێران سنوورەکانی نێوان ئێران و هەرێمی کوردستان چۆڵکرد.

 

پاساوی ئێران بۆ چۆڵکردنی ئەو کەمپ و بارەگایانەی کۆمەڵەکانی رۆژهەڵاتی کوردستان لە نزیک سلێمانی ئەوەیە، گوایە سنوورەکە بۆ هێرش دژی ئەو وڵاتە بەکار دەهێنن.

 

بەڵام ئەمجەد حوسێن پەناهی دەڵێت، "ئێمە لەپێش دامەزراندنی حکومەتی هەرێمی کوردستانەوە لە ناوچەکەین، لەدوای دروستبوونی حکومەتیشەوە هەموو هەوڵێکمان بۆ پاراستنی قەوارە و سنووری حکومەتەکە بووە؛ بۆیە بەکارمان نەهێناوە دژی هیچ وڵاتێک وەک رێزێک لە هەرێمەکە."

 

ئەو شوێنانەی حیزبەکانی رۆژهەڵاتی کوردستان پێشتر تێیاندا بوون و چۆڵیانکردن لە سنووری قەزای سیدەکان بوون لە پارێزگای هەولێر، بە تایبەتی لە گەرووی زین و بەربزێن. ئێستا هێزی پاسەوانی سنوور تێیدا جێگیر بووە.

 

عەقید سەلام عەبدولخالق، گوتەبێژی دەزگای ئاسایشی هەرێمی کوردستان (سلێمانی) سەرەتای ئەم مانگە بە تۆڕی میدیایی رووداوی گوت: "ئەوەی دەکرێت جێبەجێکردنی رێککەوتنی بەغدا و تارانە بە ئامادەبوونی هەرێمی کوردستان و خودی حیزبەکان."

 

سەلام عەبدولخالق گوتیشی، "داوای چۆڵکردنی ئەو بارەگایانە لە کاتێکدا کراوە کە 98 خانوو تەواو کراون بۆ ماڵباتی پێشمەرگەکانیان و رادەستیان دەکرێت."

 

رۆژی 19ی ئاداری 2023 عەلی شەمخانی، سکرتێری ئەوکاتی ئەنجوومەنی باڵای ئاسایشی نیشتمانیی ئێران و قاسم ئەعرەجی، راوێژکاری ئاسایشی نیشتمانیی عێراق لە بەغدا رێککەوتنی ئەمنیی نێوان هەردوو وڵاتیان واژۆ کرد و یەکێک لە خاڵەکانی تایبەت بوو بە دوورخستنەوەی هێزەکانی رۆژهەڵاتی کوردستان لە سنووری نێوان هەرێمی کوردستان و رۆژهەڵاتی کوردستان.